आज सामान्य बढ्यो नेप्से

काठमाडौँ, १३ मंसिर । आज मङ्गलवार शेयर बजार सामान्य बढेको छ । हिजो सोमवार साढे १५ अङ्कले घटेको शेयर बजार परिसूचक नेप्से आज दुई दशमलव ९९ अङ्कले बढेर १ हजार ९५३ दशमलव ३५ विन्दुमा पुगेको छ ।

यसदिन २३४ वटा कम्पनीको २५ लाख ८९ हजार कित्ता शेयर ९५ करोड ७० लाख रुपैयाँमा कारोबार भएको छ । आज माइक्रोफाइनान्स, फाइनान्स, जलविद्युत् र विकास बैंक समूहको शेयर बढेको छ भने होटल, उत्पादन, बैंक र निर्जीवन बीमा समूहको शेयर सामान्य घटेको छ । सबैभन्दा धेरै हिमालयन डिस्टिलरीको ९ करोड ७२ लाख रुपैयाँको शेयर किनबेच भयो ।

आज धौलागिरि लघुवित्त कम्पनीको शेयर छ प्रतिशत र एनसीसी बैंकको शेयर पाँच प्रतिशतले बढेको छ ।