ट्राफिक सडक सुरक्षा सप्ताह २०८२ औपचारिक रूपमा सम्पन्न

काठमाडौँ । काठमाडौं उपत्यका ट्राफिक प्रहरी कार्यालय रामशाहपथद्वारा आयोजित ‘सवारी दुर्घटना न्यूनीकरण विशेष अभियान तथा ट्राफिक सप्ताह–२०८२’ विविध जनचेतनामूलक कार्यक्रमसहित आज औपचारिक रूपमा समापन गरिएको छ। मिति २०८२/१०/०३ गते ठमेलस्थित सञ्चयकोष भवन अगाडि आयोजित समापन समारोहमा नेपाल प्रहरीका संगठन प्रमुख प्रहरी महानिरीक्षक दानबहादुर कार्कीको प्रमुख आतिथ्य तथा काठमाडौं उपत्यका प्रहरी कार्यालयका प्रमुख प्रहरी अतिरिक्त महानिरीक्षक ईश्वर कार्कीको विशेष आतिथ्य रहेको थियो।

समापन समारोहमा ख्यातिप्राप्त कलाकार, बाल कलाकार, नेपाल प्रहरी तथा ट्राफिक प्रहरीका कर्मचारीहरूले विविध सांस्कृतिक तथा सन्देशमूलक प्रस्तुति दिएका थिए। कार्यक्रममा काठमाडौं उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक नवराज अधिकारीले ट्राफिक सप्ताहअन्तर्गत सञ्चालन गरिएका गतिविधि र प्राप्त उपलब्धिबारे प्रकाश पार्दै स्वागत मन्तव्य व्यक्त गर्नुभयो।

कार्यक्रममा वरिष्ठ हास्य कलाकार मनोज गजुरेल, गायक जोन चाम्लिङ राई, गायिका आस्था राउत, गायक थानेश्वर गौतम, गायक बालचन्द्र बराल, गायिका बबिता बाँनिया ‘जेरी’, प्र्याङ्क स्टार एलिस राई तथा कलाकार रोमा न्यौपानेलगायतको प्रस्तुति रहेको थियो। साथै नेपाल प्रहरी र ट्राफिक प्रहरीका कर्मचारीहरूले समेत सचेतनामूलक प्रस्तुति प्रस्तुत गरेका थिए।

ट्राफिक सचेतनाको कमी र लापरवाहीका कारण सवारी दुर्घटना नहोस् र जनधनको क्षति न्यून गर्न सकियोस् भन्ने उद्देश्यका साथ काठमाडौं उपत्यका ट्राफिक प्रहरी कार्यालयले गत पौष २६ गतेदेखि यो विशेष अभियान सञ्चालन गरेको थियो। अभियानअन्तर्गत विभिन्न स्थानमा जनचेतनामूलक कार्यक्रम, अन्तरक्रिया तथा सडक प्रयोगकर्तालाई लक्षित गतिविधि सञ्चालन गरिएका थिए।

स्थानीय निकाय, नेपाली सेना, नेपाल प्रहरी, सशस्त्र प्रहरी, नेपाल स्काउट, एनसीसी, विभिन्न विद्यालय तथा कलेज र अन्य सरोकारवाला निकायको उल्लेखनीय सहभागिता रहेको ट्राफिक सप्ताह–२०८२ बाट तीन लाख ८० हजारभन्दा बढी सडक प्रयोगकर्ता लाभान्वित भएको ट्राफिक प्रहरीले जनाएको छ।