प्रद्युमन पोखरेलको कार्यकाल सकिँदै, मानन्धर जेठ १ देखि प्रमुख कार्यकारी अधिकृत

काठमाडौं। मुक्तिनाथ विकास बैंकले नयाँ प्रमुख कार्यकारी अधिकृतका रूपमा तारा मानन्धरलाई नियुक्त गरेको छ। बैंकको वैशाख ३ गते बसेको सञ्चालक समितिको बैठकले उनलाई उक्त जिम्मेवारी दिने निर्णय गरेको हो। हाल कार्यरत प्रमुख कार्यकारी अधिकृत प्रद्युमन पोखरेलको कार्यकाल वैशाख मसान्तमा समाप्त हुने भएपछि मानन्धरले आगामी जेठ १ गतेदेखि कार्यभार सम्हाल्नेछन्।

बैंकका अनुसार स्याङ्जा स्थायी घर भई हाल काठमाडौंको टोखा निवासी मानन्धरलाई चार वर्षका लागि प्रमुख कार्यकारी अधिकृतमा नियुक्त गरिएको हो। उनी हाल डिस मिडिया नेटवर्कमा प्रमुख कार्यकारी अधिकृतका रूपमा कार्यरत छन् र उक्त संस्थामा उनले २०८१ वैशाख ३ गतेदेखि नेतृत्व सम्हाल्दै आएका छन्।

मानन्धरले सञ्चार क्षेत्रमा आवद्ध हुनुअघि लामो समय बैंकिङ क्षेत्रमा कार्य गरेका थिए। करिब २५ वर्षको बैंकिङ अनुभव भएका उनी यसअघि मुक्तिनाथ विकास बैंककै उपप्रमुख कार्यकारी अधिकृतका रूपमा समेत कार्यरत थिए।

उनले आफ्नो बैंकिङ यात्रा साविकको नेपाल बंगलादेश बैंकबाट सुरु गरेका थिए। त्यसपछि उनले साविकको एनसीसी बैंक, सिटिजन्स बैंक, स्ट्यान्डर्ड चार्टर्ड बैंक, बिजनेस युनिभर्सल विकास बैंक, प्रभु बैंक, प्राइम कमर्शियल बैंक लगायतका विभिन्न वित्तीय संस्थाहरूमा महत्वपूर्ण जिम्मेवारी सम्हाल्दै अनुभव हासिल गरेका छन्।

बैंकिङ क्षेत्रमा अनुभवी नेतृत्वको रूपमा चिनिएका मानन्धरको पुनरागमनसँगै मुक्तिनाथ विकास बैंकको संस्थागत सुदृढीकरण र सेवा विस्तारमा थप गति आउने अपेक्षा गरिएको छ।