वैशाख २ देखि देशभर आर्थिक गणना, पाँच हजार जनशक्ति परिचालित

काठमाडौं । दोस्रो राष्ट्रिय आर्थिक गणनाको तयारी अन्तिम चरणमा पुगेको छ। राष्ट्रिय तथ्यांक कार्यालय का अनुसार देशभर गणक तथा सुपरिवेक्षकहरू परिचालित भई सम्बन्धित क्षेत्रमा खटिइसकेका छन्। आगामी वैशाख २ गतेदेखि देशव्यापी रूपमा आर्थिक गणना सुरु हुने र स्थलगत तथ्यांक सङ्कलन असारको पहिलो साताभित्र सम्पन्न गर्ने कार्यतालिका रहेको जनाएको छ।

यस गणनाका लागि करिब पाँच हजार जनशक्ति परिचालन गरिएको छ। अर्थमन्त्री डा. स्वर्णिम वाग्ले ले उद्योग, व्यवसायी तथा सरोकारवाला सबैलाई सक्रिय सहभागिताका लागि आग्रह गर्दै मुलुकको समग्र आर्थिक संरचनासँग सम्बन्धित तथ्यांक सङ्कलनमा सहयोग गर्न अनुरोध गर्नुभएको छ।

आर्थिक गणनाअन्तर्गत उद्योग, व्यवसाय, सेवा क्षेत्र, सहकारी, निजी तथा सार्वजनिक संस्थाको संख्या, प्रकार, लगानी, रोजगारी, उत्पादन तथा सेवा प्रवाहसम्बन्धी विवरण सङ्कलन गरिनेछ। दर्ता भएका वा नभएका सबै प्रकारका साना–ठूला व्यवसाय, उद्योग, कलकारखाना, गैरसरकारी संस्था, विद्यालय, अस्पताल लगायतलाई समेटेर गणना गरिने कार्यालयले जनाएको छ।

गणनाको पूर्वतयारीअन्तर्गत फागुन मसान्तमै प्रारम्भिक कार्य सम्पन्न गरिएको थियो भने चैतको सुरुवातदेखि ७७ जिल्लासहित थप सात गरी ८४ कार्यालय स्थापना गरी सञ्चालनमा ल्याइएको छ। यी कार्यालयहरू असार मसान्तसम्म सञ्चालनमा रहनेछन्।

यसअघि २०७५ सालमा गरिएको आर्थिक गणनामा देशभर नौ लाख २३ हजारभन्दा बढी प्रतिष्ठान सञ्चालनमा रहेको तथ्यांक सार्वजनिक भएको थियो। यसपटकको गणनाबाट अद्यावधिक तथा विस्तृत तथ्यांक प्राप्त भई नीतिनिर्माणमा महत्वपूर्ण आधार तयार हुने अपेक्षा गरिएको छ।