सरकारी अस्पतालमा दुई दिन बिदा लागू, आकस्मिक सेवा चौबिसै घण्टा सञ्चालन

काठमाडौँ। स्वास्थ्य तथा जनसङ्ख्या मन्त्रालयले सरकारी अस्पतालमा अबदेखि शनिबार र आइतबार दुवै दिन सार्वजनिक बिदा लागू गर्ने निर्णय गरेको छ। राजपत्रमा प्रकाशित व्यवस्थाअनुसार हप्तामा दुई दिन बिदाको नीति स्वास्थ्य क्षेत्रमा पनि लागू गरिएको मन्त्रालयले जनाएको छ। यसअघि मन्त्रालयले आइतबार पनि बहिरङ्ग सेवा सञ्चालन गर्न निर्देशन दिएको थियो।

मन्त्रालयका प्रवक्ता डा. प्रकाश बुढाथोकीका अनुसार स्वास्थ्यकर्मीको मनोबल र हितलाई ध्यानमा राख्दै सेवा व्यवस्थापनमा परिवर्तन गरिएको हो। बिदाका दिन पूर्वनिर्धारित शल्यक्रियालगायतका सेवाहरू बिरामीको अवस्थाअनुसार पुनः तालिका मिलाइनेछ भने अन्तरङ्ग तथा आकस्मिक सेवा भने चौबिसै घण्टा सञ्चालनमा रहनेछ।

मन्त्रालयले बिदाका दिनमा पनि बिरामीलाई सेवा प्राप्तिमा कुनै समस्या नआओस् भन्ने उद्देश्यले सम्भव भएसम्म सेवा निरन्तरता दिन अस्पतालहरूलाई आग्रह गरेको छ। आवश्यक सेवा उपलब्ध नभएमा बिरामीलाई नजिकको उपयुक्त अस्पतालमा सहज रूपमा पठाउने व्यवस्था मिलाउन तथा एम्बुलेन्स तयारी अवस्थामा राख्न निर्देशन दिइएको छ।

साथै बिदाका दिन उपलब्ध हुने सेवासम्बन्धी जानकारी अस्पतालले आफ्नो सूचनापाटी तथा विद्युतीय माध्यममार्फत सार्वजनिक गर्न मन्त्रालयले अनुरोध गरेको छ। यस व्यवस्थाले स्वास्थ्यकर्मीको विश्राम अधिकार र बिरामीको उपचार अधिकारबीच सन्तुलन कायम गर्ने अपेक्षा गरिएको छ।