अहिलेको संविधानलाई जनताको चाहना अनुसार संशोधन गर्नुपर्छ:प्रचण्ड

काठमाडाैं, असोज ३ — माओवादी अध्यक्ष पुष्पकमल दाहाल ‘प्रचण्ड’ले अहिलेको संविधानलाई जनताको चाहना अनुसार संशोधन गर्नुपर्ने बताएका छन्। संविधान दिवसको अवसरमा पेरिसडाँडामा आयोजित कार्यक्रममा बोल्दै उनले संविधान बनाउँदा माओवादीले उठाएका केही विषयहरू अहिले फेरि आवश्यक भएको बताएका छन्।

प्रचण्डले अहिले देशमा चलेको जेनजी आन्दोलनले माओवादीले पहिले उठाएका मुद्दाहरू सही रहेको प्रमाणित गरेको दाबी गरे। उनले प्रत्यक्ष निर्वाचित कार्यकारी प्रमुख (राष्ट्रपति), पूर्ण समानुपातिक निर्वाचन प्रणाली र पहिचानका विषयहरू संविधानमा समावेश हुनुपर्ने बताएका थिए। अहिले ती विषयलाई फेरि जनताले उठाएको भन्दै संविधान संशोधन गरेर समाधान खोज्नुपर्ने उनको धारणा छ।

उनले भने, “हामीले २०७२ सालमा संविधान लेख्दा फरक मत राखेका थियौं, आज जेनजी आन्दोलनले ती मतहरू सही ठहर गरिदिएको छ। अब ती विषयलाई समेटेर अगाडि बढ्नुपर्छ।”

प्रचण्डले संविधानमार्फत स्थायित्व, विकास र जनभावना सम्बोधन गर्नुपर्ने बेला आएको भन्दै आफू नेतृत्वको तर्फबाट परिवर्तन गर्न तयार रहेको बताए। उनले देशमा फेरि पनि जस्तोसुकै चुनौती आए पनि नेतृत्व त्यसको सामना गर्न तयार रहेको भन्दै निराश नहुन सबैलाई आग्रह गरे।

उनको भनाइ अनुसार, संविधान पुनः संशोधन गरेर प्रत्यक्ष निर्वाचित कार्यकारीको व्यवस्था गर्न सकिन्छ।