दक्षिण कोरियामाथि जित निकाल्दै दक्षिण अफ्रिका पहिलोपटक नकआउट चरणमा

काठमाडौँ । दक्षिण अफ्रिकाले पहिलोपटक फिफा विश्वकप २०२६ को नकआउट चरणमा स्थान बनाएको छ। समूह ‘ए’ अन्तर्गतको अन्तिम खेलमा दक्षिण कोरियालाई १–० गोल अन्तरले हराउँदै दक्षिण अफ्रिकाले इतिहास रचेको हो।

खेलको ६३औँ मिनेटमा थापेलो मासेकोले गरेको गोल नै दक्षिण अफ्रिकाको जितका लागि निर्णायक बन्यो। यसअघि १९९८, २००२ र २०१० मा विश्वकप खेले पनि दक्षिण अफ्रिकाले कहिल्यै समूह चरण पार गर्न सकेको थिएन। यो पटक भने टोलीले तीन खेलबाट ४ अंक जोड्दै समूह उपविजेताको रूपमा नकआउट चरणमा प्रवेश गरेको छ।

सहआयोजक मेक्सिकोले सबै तीन खेल जितेर ९ अंकसहित समूह विजेता बनेको छ। दक्षिण कोरियाको ३ अंक भए पनि उत्कृष्ट तेस्रो स्थानमा पर्ने टोलीमध्ये एक बन्दै अर्को चरणमा पुग्ने सम्भावना अझै बाँकी छ। चेक रिपब्लिक भने १ अंकसहित प्रतियोगिताबाट बाहिरिएको छ।