काठमाडौं । फेसन आर्ट निर्देशक तथा स्टाइलिस्ट सोन्या गुरुङको नेतृत्वमा सोन्या स्टाइल क्रिएटिभ फेसन टिम नेपालले हङकङस्थित हाइभ स्टुडियोसँगको सहकार्यमा “पहाडदेखि महानगरसम्म – पहिलो अध्याय” नामक फेसन परियोजना सफलतापूर्वक सम्पन्न गरेको छ।
उक्त परियोजनामार्फत नेपाली कपडा तथा परम्परागत गहनालाई सृजनात्मक फेसन कला र दृश्य कथावाचनको माध्यमबाट अन्तर्राष्ट्रिय मोडलहरूको सहभागितासहित प्रस्तुत गरिएको थियो। परियोजनाको उद्देश्य नेपाली सांस्कृतिक पहिचानलाई विश्वमञ्चमा स्थापित गर्नु रहेको आयोजक पक्षले जनाएको छ।
परियोजनाअन्तर्गत आयोजित भेटघाट तथा अन्तरक्रिया कार्यक्रममा नेपाली समाजका विशिष्ट व्यक्तित्व, सामाजिक अगुवा तथा आमन्त्रित अतिथिहरूको उपस्थिति रहेको थियो। कार्यक्रममा फेसन प्रस्तुति तथा कलात्मक प्रदर्शनसमेत गरिएको थियो।
सोन्या गुरुङले विगत लामो समयदेखि फेसन शो, सांस्कृतिक प्रस्तुति तथा सचेतनामूलक कार्यक्रमहरू सञ्चालन गर्दै आएकी छन्। उनका प्रस्तुति परम्परागत र्याम्प शोभन्दा फरक शैली, सृजनात्मक संयोजन र कला–संस्कृतिको समिश्रणका कारण परिचित छन्। साथै उनले कम अवसर प्राप्त प्रतिभाहरूलाई प्राथमिकता दिने प्रयास गर्दै आएकी छन्।
यस परियोजनालाई हङकङका विभिन्न प्रतिष्ठित समूहहरूको समेत समर्थन प्राप्त भएको बताइएको छ। लोकप्रियता भन्दा पनि प्रतिभा र दृष्टिकोणलाई प्राथमिकता दिने अवधारणालाई यस परियोजनाले जोड दिएको छ।
यस अभियानमा नेपाल पर्यटन बोर्डलाई पर्यटन प्रवर्द्धन साझेदार र नेपाल वायुसेवा निगमलाई हवाई सेवा साझेदारका रूपमा समावेश गरिएको थियो। यसले नेपाली संस्कृति, सिर्जनशीलता र पहिचानलाई अन्तर्राष्ट्रिय स्तरमा प्रवर्द्धन गर्ने उद्देश्यलाई थप बल पुगेको बताइएको छ।
“पहाडदेखि महानगरसम्म” परियोजनामार्फत सोन्या स्टाइलले नेपाली फेसन, कपडा, गहना तथा सांस्कृतिक पहिचानलाई विश्वमञ्चमा पुर्याउने अभियानलाई निरन्तर अघि बढाइरहेको जनाएको छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
