सुदूरपश्चिमका मुख्यमन्त्रीलाई विश्वासको मत दिन माओवादी केन्द्रलाई प्रचण्डको निर्देशन

 धनगढी, २१ फागुन । सुदूरपश्चिमका मुख्यमन्त्री कमल शाहलाई माओवादी केन्द्रले विश्वासको मत दिने भएको छ ।पार्टी अध्यक्ष एवम् प्रधानमन्त्री पुष्पकमल दाहाल प्रचण्डको निर्देशनपछि मुख्यमन्त्री शाहलाई विश्वासको मत दिने माओवादीले तयारी गरेको छ ।

यसअघि नागरिक उन्मुक्ति पार्टीले पनि शाहलाई विश्वासको मत दिने बताइसकेको छ ।माओवादी र नाउपाको समेत साथ पाउने भएपछि मुख्यमन्त्री शाहले प्रदेशसभाबाट प्रचण्ड बहुमत पाउने निश्चित भएको छ । नेकपा एमालेले भने सुदूरपश्चिमका मुख्यमन्त्री कमलबहादुर शाहलाई विश्वासको मत नदिने निर्णय गरेको छ ।

आज दिउँसो १ बजे प्रदेशसभाको बैठकमा विस्वासको मत सम्बन्धी प्रस्ताव प्रस्तुत हुनेछ ।२६ माघमा नागरिक उन्मुक्ति पार्टीले विश्वासको मत नदिएपछि एमालेका राजेन्द्र सिंह रावल नेतृत्वको सरकार अल्पमतमा परेको थियो ।

सोही दिन सबैभन्दा ठुलो दलको हैसियतले नेपाली कांग्रेस सुदुरपश्चिमका संसदीय दलका नेता समेत रहेका शाह मुख्यमन्त्रीमा नियुक्त भएका थिए ।