उपभोक्ता हित संरक्षणका लागि विभागद्वारा व्यापक अनुगमन

काठमाडौं। वाणिज्य, आपूर्ति तथा उपभोक्ता संरक्षण विभागले काठमाडौं उपत्यकाका विभिन्न स्थानमा एकैदिन ५६ वटा व्यावसायिक फर्ममा स्थलगत अनुगमन गरेको छ। विभागका अनुसार खाद्य पदार्थ तथा अन्य दैनिक उपभोग्य वस्तुको बिक्री–वितरण गर्ने पसल तथा प्रतिष्ठानहरूलाई लक्षित गर्दै अनुगमन गरिएको हो।

बुधबार गरिएको अनुगमनका क्रममा विभागले ती व्यवसायलाई आवश्यक सुधारात्मक निर्देशन दिएको जनाएको छ। अनुगमनका क्रममा पसलहरूले उपभोक्तालाई बिल उपलब्ध गराए नगरेको, मूल्यसूची प्रष्ट रूपमा प्रदर्शन गरे नगरेको तथा कानुनअनुसार करसम्बन्धी दायित्व पूरा गरे नगरेको विषयमा विशेष ध्यान दिइएको थियो।

विभागले उपभोक्ता अधिकार सुनिश्चित गर्न बजारमा हुने अनियमितता नियन्त्रण गर्ने उद्देश्यले नियमित रूपमा यस्ता अनुगमन कार्यक्रम सञ्चालन गर्दै आएको जनाएको छ।

अनुगमनका क्रममा उपभोक्ता अधिकारकर्मी तथा सम्बन्धित सरोकारवालाहरूको समेत उपस्थिति रहेको विभागले स्पष्ट पारेको छ।

विभागले आगामी दिनमा पनि बजार अनुगमनलाई अझ प्रभावकारी बनाउँदै उपभोक्ताको अधिकार संरक्षणमा जोड दिने जनाएको छ।