तीन नयाँ तालिम पाठ्यक्रम स्वीकृत, विद्यालय सुधारमा जोड

काठमाडौँ । शिक्षा तथा खेलकुद मन्त्रालयले शिक्षा क्षेत्र सुधार र प्रशासनिक कामलाई प्रभावकारी बनाउन तीन वटा नयाँ तालिम कार्यक्रम स्वीकृत गरेको छ । मन्त्री सस्मित पोखरेलको अध्यक्षतामा बसेको शैक्षिक जनशक्ति विकास परिषद्को २९औँ बैठकले शिक्षक, प्रधानाध्यापक र शिक्षा मन्त्रालयका कर्मचारीका लागि छुट्टाछुट्टै तालिम पाठ्यक्रम अनुमोदन गरेको हो ।

स्वीकृत कार्यक्रमअनुसार ‘शिक्षक प्रशिक्षक तालिम’, ‘प्रधानाध्यापक नेतृत्व विकास तालिम’ र ‘शिक्षा सेवाका विभिन्न तहका कर्मचारीका लागि सेवाकालीन तालिम’ सञ्चालन गरिनेछ । यी तालिमहरू शिक्षा नियमावली २०५९ अनुसार तयार गरिएको हो ।

मन्त्रालयका अनुसार शिक्षक प्रशिक्षक तालिमले प्रशिक्षकको क्षमता बढाउने र शिक्षकको पेसागत विकासलाई सहयोग गर्नेछ । त्यस्तै, प्रधानाध्यापक नेतृत्व तालिमले विद्यालय सञ्चालन र व्यवस्थापन सुधार गर्ने अपेक्षा गरिएको छ । कर्मचारीका लागि बनाइएको तालिमले सेवा प्रवाहलाई अझ प्रभावकारी बनाउने र शिक्षा कार्यक्रमहरू राम्रोसँग कार्यान्वयन गर्न सहयोग पुग्ने मन्त्रालयले जनाएको छ ।