प्रधानमन्त्रीविरुद्ध हर्क साम्पाङको लगातार विरोध, आज पनि संसद्‍मा नाराबाजी गर्ने

काठमाडौँ । प्रतिनिधिसभामा सरकारको कामकारबाहीमाथि लगातार प्रश्न उठाउँदै आएका सांसद हर्क साम्पाङले आफ्नो विरोधलाई अझ कडा बनाएका छन् । श्रम संस्कृति पार्टीका अध्यक्षसमेत रहेका साम्पाङले प्रधानमन्त्री बालेन्द्र शाह संसद्प्रति जिम्मेवार र जवाफदेही नबन्दासम्म सदनमा विरोध जारी राख्ने बताएका छन् ।

बुधबार संसद् बैठकमा उनले सरकारको कार्यशैलीप्रति असन्तुष्टि जनाउँदै विरोध गरेका थिए । त्यही अडानलाई उनले बिहीबार पनि निरन्तरता दिने बताएका छन् । साम्पाङले प्रधानमन्त्रीले संसद्लाई पर्याप्त महत्व नदिएको र जनताका सवालमा स्पष्ट जवाफ नदिएको आरोप लगाउँदै आएका छन् ।

उनले सामाजिक सञ्जालमार्फत आजको संसद् बैठकमा प्रयोग गर्ने नारासमेत सार्वजनिक गरेका छन् । यसले संसद्भित्र उनको विरोध अझ संगठित र आक्रामक बन्ने संकेत देखिएको छ । पछिल्ला दिनमा साम्पाङ संसद्मा सरकारमाथि खुलेर दबाब दिने सांसदका रूपमा देखिन थालेका छन् ।