सिंहदरबारमा जलेका सवारीसाधन हटाउन मन्त्री घिसिङको निर्देशन

काठमाडौं — ऊर्जा, जलस्रोत तथा सिँचाइ, भौतिक योजना तथा यातायात र सहरी विकासमन्त्री कुलमान घिसिङले जेनजी आन्दोलनका क्रममा सिंहदरबार परिसरमा जलाइएका सवारीसाधन तुरुन्त हटाउन निर्देशन दिएका छन्। उनका अनुसार, यत्रतत्र छरिएका क्षतिग्रस्त सवारीसाधनका कारण सिंहदरबार परिसर कुरूप देखिएको छ, जसले नकारात्मक सन्देश दिन्छ।

“कार्यालयको भित्री काम चलिरहला, तर बाहिरी स्वरूप चिटिक्क हुनुपर्छ,” घिसिङले भने। उनले सामान्य क्षति भएका भवनमा रंगरोगन गर्ने, जलेका सवारीसाधन हटाउने र क्षतिको मूल्याङ्कन तुरुन्त गर्न सम्बन्धित निकायलाई निर्देशन दिएका छन्।

सकारात्मक सन्देश दिन “हाम्रा संरचना हामी आफैँ बनाऔँ” अभियान सुरु गरिने र यसमार्फत सरकार तथा स्वदेश–विदेशमा रहेका नेपालीको सहयोगमा पुनर्निर्माण थालिने उनले स्पष्ट पारे। सहरी विकास मन्त्रालयले समेत मातहतका संरचनामा पुगेको क्षति यकिन गर्न कार्यदल गठन गरी मूल्याङ्कन कार्य अघि बढाइसकेको जनाएको छ।