उपत्यकामा अतिक्रमण विरुद्ध अभियान ,मनोहरामा भत्काउने अभियान जारी

काठमाडौँ । काठमाडौँ उपत्यकाको मनोहरा खोला किनारमा रहेका सुकुमवासी बस्तीका बाँकी घरटहरा सोमबार बिहानैदेखि डोजर प्रयोग गरी भत्काउन थालिएको छ । बिहान ७ बजेदेखि १३ वटा डोजर परिचालन गरी अतिक्रमित संरचना हटाउने कार्यलाई तीव्रता दिइएको हो ।

यसअघि आइतबारदेखि सुरु गरिएको भत्काउने अभियान अन्तर्गत केही घरटहरा बाँकी रहेकाले सोमबार पनि कार्य निरन्तर अगाडि बढाइएको हो । उक्त कार्यमा भक्तपुरबाट खटिएको नेपाल प्रहरी र काठमाडौँ महानगरपालिकाको नगर प्रहरीको संयुक्त टोली परिचालन गरिएको छ ।

यसअघि प्रधानमन्त्री बालेन्द्र शाहको निर्देशनमा थापाथली र गैरीगाउँ क्षेत्रमा रहेका सुकुमवासी बस्ती हटाइएका थिए । ती क्षेत्रका बासिन्दालाई कीर्तिपुर, नागार्जुन र भक्तपुरका विभिन्न स्थानमा स्थानान्तरण गरिएको महानगरपालिकाले जनाएको छ ।

अधिकार सम्पन्न बागमती सभ्यता एकीकृत विकास समितिका अनुसार काठमाडौँ उपत्यकामा मात्र बागमती नदी किनारसहित २७ स्थानमा सरकारी जग्गा अतिक्रमण भएको छ । ती क्षेत्रमा कुल ३ हजार ४९६ घरटहरा रहेको तथ्यांक सर्वोच्च अदालतमा पेश गरिएको बहस नोटमा उल्लेख गरिएको छ ।

समितिका विवरणअनुसार काठमाडौँ महानगर क्षेत्रमा सबैभन्दा धेरै २ हजार १७० घरटहरा रहेका छन् भने कागेश्वरी मनोहरा, बुढानीलकण्ठ, गोदावरी, ललितपुर महानगर र भक्तपुर जिल्लामा पनि उल्लेख्य संख्यामा अतिक्रमित बस्ती रहेका छन् । देशभर भने करिब १५ देखि १६ लाखसम्म सुकुमवासी परिवार रहेको सरकारी आँकडाले देखाएको छ ।