बुद्धभूमि हाइड्रोको सेयर बाँडफाँट, ७४ हजार ४०० आवेदकले पाए

काठमाडौं– नुवाकोटमा निर्माणाधीन बुद्धभूमि नेपाल हाइड्रोपावर कम्पनी लिमिटेडले सर्वसाधारण लगानीकर्ताका लागि छुट्ट्याएको सेयर शुक्रबार बाँडफाँट भएको छ ।

निष्काशन तथा बिक्री प्रबन्धक सिभिल क्यापिटल मार्केटको कार्यालयमा भएको बाँडफाँटमा ७४ हजार ४०० आवेदकले १० कित्ताका दरले सेयर पाएका छन् ।

कम्पनीले असोज ११ गतेदेखि १४ गतेसम्म सर्वसाधारणको लागि ८ करोड रुपैयाँ बराबरको ८ लाख कित्ता सेयर सार्वजनिक निष्कासन गरेको थियो ।

उक्त कम्पनीको सेयरका लागि २० लाख ३० हजार ९५५ जनाले आवेदन दिएको र ती आवेदनमार्फत २ करोड ४४ लाख ३७० कित्ता माग भएको बिक्री प्रबन्धकको भनाइ छ । तीमध्ये १६ हजार ३३ जनाको आवेदन अस्वीकृत भएको छ । स्वीकृत भएका २० लाख १४ हजार ९२२ जनालाई समावेश गरेर गोलाप्रथाबाट सेयर बाँडफाँट गरिएको हो ।

कम्पनीले केही अघि आयोजना प्रभावित जिल्ला नुवाकोटका लगानीकर्ताका लागि सेयर बिक्री गरेको थियो ।