काठमाडौँ । पोखरामा पछिल्लो समय भारतीय पर्यटकको संख्या उल्लेख्य रूपमा बढेको छ। पर्यटकको चहलपहल बढेसँगै यहाँका होटलहरू लगभग भरिभराउ भएका छन्। विशेषगरी फेवातालस्थित तालबाराही मन्दिर, विन्ध्यवासिनी, मुक्तिनाथ तथा अन्य धार्मिक र पर्यटकीय स्थलमा भारतीय पर्यटकको भीड देखिएको छ।
होटल व्यवसायीका अनुसार भारतमा बढ्दो गर्मी र बिदाको समय भएकाले धेरै भारतीय नागरिकले नेपाललाई घुम्नका लागि रोजिरहेका छन्। पर्यटक बढेसँगै डुङ्गा सयर, प्याराग्लाइडिङ, पदयात्रा, र्याफ्टिङ र बन्जी जस्ता गतिविधिमा पनि उत्साहजनक सहभागिता देखिएको छ।
फेवातालमा दैनिक चारदेखि पाँच हजारसम्म भारतीय पर्यटकले डुङ्गा सयर गर्ने गरेका छन्। व्यवसायीहरूका अनुसार करिब डेढ महिनामा मात्रै डेढ लाख भारतीय पर्यटक पोखरा पुगेका छन्। अहिले पोखराका पाँचतारे होटलदेखि साना होटल र धर्मशालासम्ममा राम्रो अकुपेन्सी देखिएको छ।
पर्यटन व्यवसायीहरूले भारतीय पर्यटकको आगमनले अफसिजनमा पनि पर्यटन क्षेत्र चलायमान बनेको बताएका छन्। उनीहरूका अनुसार नेपालका धार्मिक र पर्यटकीय गन्तव्यको भारतमा थप प्रचार गर्न सके भारतीय पर्यटकको संख्या अझ बढ्न सक्छ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
