नेपाली बजारमा हुवासिन सिमेन्ट आउने भएको छ

चिनियाँ कम्पनी हुवासिन सिमेन्ट कम्पनीले आफ्नो उत्पादन गरेको ११५ वर्ष मनाइरहेको समयमा नेपालमा सोही ब्रान्डको सिमेन्ट उत्पादन सुरु गरेको हो ।
धादिङ जिल्लाको बेनीघाट ताल्चीमा रहेको उद्योगमा शनिबार ११५ जना कामदारले संयुक्त रूपमा उत्पादन सुरु गरेका हुन् ।हुवासिन सिमेन्ट कम्पनीका उपमहाप्रबन्धक डिल्लीराज पोखरेलका अनुसार यो उद्योगबाट व्यावसायिक उत्पादनका लागि थप दुई महिना लाग्नेछ । डिसेम्बरभित्रै परीक्षण उत्पादन थाल्ने भनिए पनि प्राविधिक तयारी बाँकी रहेकाले केही समय ढिला भएको पोखरेलले बताउनुभयो ।नेपाली र चिनियाँ व्यवसायीको संयुक्त लगानी रहेको सो उद्योगमा गत कात्तिकको अन्तिम सातादेखि विद्युत् उपलब्ध भएको थियो । हुवासिन सिमेन्ट नेपालले ओपीसी र पीपीसी गरेर दैनिक तीन हजार मेट्रिक टन सिमेन्ट उत्पादन गर्नेछ ।
आफ्नै उच्च गुणस्तरको चुनढुङ्गा खानीबाट उत्पादित चुनढुङ्गाबाट क्लिङ्कर र सिमेन्ट उत्पादन गर्ने उद्योगले दाबी गरेको छ । हुवासिन सिमेन्ट उत्पादनसँगै नेपालको सिमेन्ट बजारमा गुणस्तरको परिवर्तनको महसुस सबैले गर्ने विश्वास कम्पनीको रहेको छ । नेपाली बजारमा हुवासिन सिमेन्ट आउनेबित्तिकै गुणस्तरमा प्रतिस्पर्धा सुरु हुनेछ ।