शिक्षा र उद्योगबीचको सहकार्यलाई प्रगाढ बनाउन एम्बार्क कलेजको पहल

काठमाण्डौ।एम्बार्क कलेजले आफ्नो पुल्चोक क्याम्पसमा उद्योग परामर्श बोर्डको बैठक आयोजना गरेको छ। कलेज र उद्योग क्षेत्रबीचको सहकार्यलाई प्रगाढ बनाउन आयोजित उक्त बैठकको अध्यक्षता कलेजका अध्यक्ष शेखर गोल्छाले गर्नुभएको थियो।

बैठकमा उद्योग क्षेत्रका प्रतिष्ठित व्यक्तिहरूको उपस्थिति रहेको थियो, जसमा ग्लोबल आईएमई ग्रुपका सह-संस्थापक हेमराज ढकाल, मुरार्का अर्गनाइजेसनका अध्यक्ष पशुपति मुरार्का, प्रिज्मा एडभर्टाइजिङका सीईओ रञ्जित आचार्य, गोल्डस्टार शूजकी कार्यकारी निर्देशक विदूषी राणा, र एमएडब्लू ग्रुपका प्रबन्ध निर्देशक विष्णु कुमार अग्रवाल सहभागी थिए। साथै, बोर्ड अफ डाइरेक्टर्सका प्रतिनिधिहरू सीमा गोल्छा, अभिमन्यु गोल्छा, र श्रेया गिरी पनि उपस्थित रहे।

कलेज नेतृत्व टोलीका कार्यकारी निर्देशक तथा सीईओ आसिश ठाकुर, प्रिन्सिपल स्टिभन ड्राइभर, र शैक्षिक प्रमुख सौरभ सत्यालले शिक्षामा नवीनता ल्याउने कलेजको दृष्टिकोण प्रस्तुत गर्नुभएको थियो।

बैठकमा उद्योगको आवश्यकता अनुरूप पाठ्यक्रम परिमार्जन, उद्यमशीलता प्रवर्द्धनका लागि “एम्बार्क बिजनेस इन्क्युबेसन” जस्ता पहलहरू, र विद्यार्थीलाई व्यवहारिक सीप तथा उद्यमशील उपकरण प्रदान गर्ने कार्यक्रमहरूको विषयमा छलफल भएको थियो।

बैठकले दिएको रणनीतिक सुझावप्रति कलेजले आभार व्यक्त गर्दै नेपालमा शिक्षाको रूपान्तरणका लागि निरन्तर प्रयास गर्ने प्रतिबद्धता जनाएको छ।