‘अर्थमन्त्रीद्वारा देशमाथि गद्दारी’

प्रमुख प्रतिपक्षी एमालेले प्रतिनिधिसभाको बिहीबारको बैठक बहिष्कार गरेको छ। विनियोजन विधेयकका विभिन्न शीर्षकमाथि सदनमा उठेका प्रश्नको अर्थमन्त्री जनार्दन शर्माले जवाफ दिँदा र विनियोजन विधेयक पारित गर्दा एमालेले बैठक बहिष्कार गरेको हो।

बैठकको सुरुमा अर्थमन्त्री जनार्दन शर्माले जवाफ दिने कार्यसूची थियो। सभामुख अग्निप्रसाद सापकोटाले अर्थमन्त्री शर्मालाई जवाफ दिन रोस्ट्रममा बोलाएपछि विरोधमा एमाले सांसद आआफ्नो सिटबाट उठेका थिए। यसैक्रममा एमाले सांसद भानुभक्त ढकालले अर्थमन्त्रीले बजेट सार्वजनिक नहुँदै करका दर चुहावट गरेको आरोप लगाउँदै यस विषयमा छानबिन नभएसम्म सदन अगाडि बढ्न नसक्ने बताए। तर सभामुखले अर्थमन्त्री शर्मालाई जवाफ दिन समय दिए। अर्थमन्त्रीले भनाइ राख्न नपाउँदै सांसद हृदयेश त्रिपाठीले पनि बजेटका विषयमा गम्भीर प्रश्न उठेकाले छानबिन हुनुपर्ने माग गरे।

सभामुखले फेरि अर्थमन्त्रीलाई भनाइ राख्न अनुमति दिए। अर्थमन्त्रीले आफूले कुनै पनि गल्ती नगरेको र करका दर चुहावट पनि नगरेको बताए। अर्थमन्त्रीले बोलेपछि स्पष्टीकरण नसोध्ने भन्दै एमालेका सबै सांसद सदनबाट बाहिरिएका थिए। त्यसअघि एमाले प्रमुख सचेतक विशाल भट्टराईले देशमाथि अर्थमन्त्रीले ‘गद्दारी’ गरेको आरोप लगाएका थिए।

‘गद्दारी’ शब्द असंसदीय भन्दै सभामुखले रेकर्डबाट हटाउने बताए। गद्दारी शब्द असंसदीय नभएको दाबी गर्दै भट्टराईले त्यस्तो हो भने संसदीय छानबिन समिति गठन गर्न चुनौती दिए। लगत्तै उनले अर्थमन्त्रीको बेतुकको कुरा सुनेर संसद्मा बस्न नसक्ने बताएपछि एमालेका सबै सांसद बैठक कक्षबाट बाहिरिएका थिए।

प्रमुख प्रतिपक्षी एमालेका सांसद बैटककक्षबाट बाहिरिएपछि नेमकिपाका सांसद प्रेम सुवालले मात्रै अर्थमन्त्रीलाई स्पष्टीकरण सोधेका थिए। अर्थमन्त्रीले जवाफ दिएपछि रक्षा मन्त्रालयको जवाफ दिने कार्यक्रम थियो। रक्षा मन्त्रालय, राष्ट्रिय योजना आयोगको सचिवालय, प्रधानमन्त्री तथा मन्त्रिपरिषद्को कार्यालय, राष्ट्रपतिको कार्यालय र उपराष्ट्रपतिको कार्यालयका तर्फबाट जवाफ दिने कार्यक्रममा भने एमाले सांसद सहभागी भए।

बैठकमा सांसदले प्रस्तुत गरेका खर्च कटौतीका प्रस्तावहरूलाई निर्णयार्थ प्रस्तुत गरेपछि विनियोजन विधेयक, २०७९ का दफाहरूलाई निर्णयार्थ पेस गरियो। यो विधेयकमा एमालेका सांसदले विपक्षमा मतदान गरे। त्यसपछि सभामुखले विनियोजन विधेयक, २०७९ पारित गर्ने प्रस्ताव प्रस्तुत गर्न अर्थमन्त्री जनार्दन शर्मालाई समय दिए। त्यसपछि एमाले सांसदले आआफ्नो सिटमा उठेर विरोध जनाए। एमाले सांसद गोकर्ण बिष्टले तीन दिनसम्म प्रतिपक्षले बजेटमा राखिएका करका दर चुहावटबारे प्रश्न उठाइरहँदा कुनै छानबिन नभएको भन्दै असन्तुष्टि पोखे। उनले यस्तो अवस्थामा अर्थमन्त्रीका कुरा सुन्नुभन्दा बैठक बहिष्कार गर्ने बताए। त्यसपछि एमाले सांसदरू सदनबाट बाहिरिएका थिए।

एमालेले बैठक बहिष्कार गरेपछि सभामुखको अनुमतिले विनियोजन विधेयक पारित गरियोस् भन्ने प्रस्ताव राख्न अर्थमन्त्री शर्मा रोस्ट्रममा पुगे। अर्थमन्त्री शर्माले दुई-दुईपटक संसद्को हत्या भएर गठबन्धनको सरकार बनेको स्मरण गर्न चाहेको भन्दै विनियोजन विधेयक पारित गरियोस् भन्ने प्रस्ताव सदनसमक्ष प्रस्तुत गरेका थिए। सदनले विनियोजन विधेयक पारित गर्‍यो।यो समाचार राजधानी दैनिकमा छ ।