ओलीको पालामा एसपीपीको कार्यान्वयन भएको भन्ने प्रमाण संसदमा पेश गर्नु पूर्ण रुपमा जिम्मेवारी म लिन्छु:ईश्वर पोखरेल

काठमाडौँ, २ असार । ने्कपा (एमाले) का वरिष्ठ उपाध्यक्ष तथा पूर्व रक्षामन्त्री ईश्वर पोखरेलले ओली सरकारको पालामा अमेरिकी ‘स्टेट पार्टनरसिप प्रोग्राम’ (एसपीपी) सम्झौता नभएको बताउनुभएको छ । आज बसेको प्रतिनिधिसभाको बैठकमा पोखरेलले ओली सरकारको पालामा एसपीपी भएको भन्ने सत्तारुढ दलका नेताको अभिव्यक्ति भ्रामक रहेको भन्दै आपत्ति जनाएका हुन् ।

उनले अगाडी भने, ‘केपी ओलीले नेतृत्व गर्दा म उपप्रधान एवं रक्षा मन्त्री थिएँ। यदि त्यसबेलाका कुनै लिखतहरु, माइनटहरु छन् भने संसदमा प्रस्तुत गरियोस। म पूर्ण रुपमा जिम्मेवारी लिन्छु।’

ओली सरकारको पालामा एसपीपी भएको भन्ने सत्तारुढ दलका नेताको अभिव्यक्ति एमालेविरुद्ध रचिएको षड्यन्त्रको रुपमा रहेको भन्दै उहाँले यसलाई पुष्टि गर्न चेतावनी दिनुभयो । पुष्टि गर्न नसक्ने हो भने आफ्नो अभिव्यक्तिप्रति माफी माग्नुपर्ने पोखरेलको माग छ ।

पोखरेलले सन् २०१५ र २०१७ का सुशील कोइराला र शेरबहादुर देउवा सरकारले एसपीपीबारे अमेरिकी प्रस्तावमा सकरात्मक प्रतिक्रिया दिएको दाबी गर्दै उहाँले केपी ओली नेतृत्वको सरकारको पालामा आफू रक्षामन्त्री रहेकाले यस्तो कुनै सम्झौता नभएको दाबी गर्नुभयो ।

‘सबैभन्दा पहिले सन् २०१५ र २०१७ मा प्रस्ताव औपचारिक ढंगले सकारात्मक प्रतिक्रिया दिएर नेपालको तर्फबाट पठाइएको थियो । सन् २०१५ मा यो मुलुकमा कसको नेतृत्वमा सरकार थियो ? प्रधानमन्त्री को थियो प्रधानमन्त्री र रक्षामन्त्री हुने पार्टीले यसको बारेमा के भन्छ ? सन् २०१७ मा जसले यो एसपीपीलाई सकारात्मक ढंगले अमेरिकालाई पठायो त्यसबेला मुलुकलाई नेतृत्व गर्ने प्रधानमन्त्री को थियो ? , उनले भने, ‘सन् २०१५ मा यो मुलुकको प्रधानमन्त्री र रक्षामन्त्री सुशील कोइराला हुनुहुन्थ्यो । २०१७ सालमा प्रधानमन्त्री शेरबहादुर देउवा हुनुहुन्थ्यो । रक्षामन्त्रालय कसले चलाएको थियो शेरबहादुरजीले राम्रोसँग बुझ्नुहुन्छ ।’

असंलग्न परराष्ट्र नीति विपरीत हुने कार्यलाई एमालेले रोक्ने भन्दै आफू रक्षामन्त्री हुँदा नेपाल कुनै पनि सैन्य कार्यक्रममा सहभागी नहुने अमेरिकालाई बताएको पोखरेलले दाबी गरे ।

उनले एसपीपीको विषय सार्वजनिक भएपछि त्यसलाई सुरुमा थाहा नपाएको जस्तो गरिएको र पछि लुकाउने प्रयास भएको पोखरेलको भनाइ थियो । पोखरेलले सत्ता टिकाउन गठबन्धनका नेताहरुबाट विभिन्न अभिव्यक्ति आइरहेको भन्दै प्रमाणसहित आउन चुनौती समेत दिएका छन् ।