संसदमा हर्क साम्पाङको लगातार विरोध, सरकारलाई संसदप्रति जवाफदेही हुन आग्रह

काठमाडौँ । श्रम संस्कृति पार्टीका अध्यक्ष तथा सांसद हर्कराज राई (साम्पाङ) ले सरकार र मन्त्रीहरू संसदप्रति जवाफदेही नभएको भन्दै लगातार तीन दिनदेखि विरोध जनाएका छन् । बुधबारको बैठकमा पनि उनले प्लेकार्ड देखाएर विरोध गरेका थिए ।

सभामुख डोलप्रसाद अर्याल ले भने उनको विरोध गर्ने शैली नियमअनुसार नभएको भन्दै चेतावनी दिएका थिए । त्यसपछि साम्पाङले आफूहरूले व्यक्तिगत नभई जनताका प्रश्न उठाएको बताएका छन् ।

उनले मन्त्रीहरू संसदमा उपस्थित नहुने, नीति तथा कार्यक्रम वा छलफलमा पनि नआउने र प्रश्नको जवाफ दिन नआउने भन्दै असन्तुष्टि जनाए । उनका अनुसार सरकारले संसद नियमावलीको भावना पालना नगरेको देखिन्छ ।

साम्पाङले सीमा समस्या, महँगी नियन्त्रण, सहकारी पीडितको रकम फिर्ता, सुकुम्बासी समस्या लगायत विषयमा सरकारसँग जवाफ माग गरेका छन् । उनका अनुसार ५–६ वटा महत्वपूर्ण प्रश्न छन् जसको स्पष्ट जवाफ चाहिन्छ ।

संसद बैठक सुरु हुनेबित्तिकै उनले निरन्तर प्लेकार्ड देखाएर विरोध गर्दै आएका छन् ।