बिहान ७ बजेदेखि डोजर चल्यो, नदी किनारका बस्ती हटाउने अभियान तीव्र

काठमाडौं । काठमाडौं महानगर क्षेत्रभित्र नदी किनार आसपास रहेका सुकुमवासी बस्तीहरू खाली गराउने सरकारी अभियान आज बिहानदेखि तीव्र बनाइएको छ। जिल्ला प्रशासन कार्यालयको निर्देशनअनुसार बिहान ७ बजेदेखि विभिन्न स्थानमा एकैपटक डोजर परिचालन गर्दै अतिक्रमित बस्ती हटाउने कार्य सुरु गरिएको हो। प्रशासनका अनुसार वंशीघाट, बल्खु, स्वयम्भू, बालाजु, सामाखुशी, खाडिपाखा र रानीबारीलगायत क्षेत्रलाई प्राथमिकतामा राखेर अभियान सञ्चालन भइरहेको छ।

यस अभियानका लागि नेपाल प्रहरी, सशस्त्र प्रहरी बल नेपाल र महानगर प्रहरीको संयुक्त टोली परिचालन गरिएको छ। प्रशासनले यसअघि नै सूचना जारी गर्दै तोकिएको समयभित्र बस्ती खाली गर्न आग्रह गरेको थियो भने अटेर गरी बस्दा हुन सक्ने क्षतिको जिम्मेवारी स्वयं बसोबासीले व्यहोर्नुपर्ने चेतावनीसमेत दिएको छ।

प्रशासनका अनुसार नदी किनारका सार्वजनिक, पर्ति तथा निजी स्वामित्वका जग्गामा अनाधिकृत रूपमा वर्षौंदेखि बसोबास गर्दै आएका बस्तीहरूलाई विपद् जोखिम न्यूनीकरण र मानवीय उद्धारका दृष्टिले हटाउन लागिएको हो। यसअघि थापाथली, गैरीगाउँ, सिनामंगल र मनोहरालगायत क्षेत्रमा सुरु गरिएको अभियानलाई विस्तार गर्दै आज अन्य स्थानमा पनि कार्य अघि बढाइएको हो।

सरकारले प्रभावित परिवारलाई सुरक्षित स्थानमा सार्ने, आवश्यक मानवीय सहायता उपलब्ध गराउने तथा वास्तविक भूमिहीनको पहिचान गरी दीर्घकालीन व्यवस्थापन गर्ने प्रतिबद्धता जनाएको छ। बिरामी, अशक्त, वृद्धवृद्धा, गर्भवती र बालबालिकालाई प्राथमिकतामा राखेर उद्धार गर्न सुरक्षा निकायलाई तयारी अवस्थामा राखिएको छ भने आवश्यक परे एम्बुलेन्स सेवा पनि उपलब्ध गराइने जनाइएको छ।

यसैबीच, प्रशासनले बस्ती खाली गर्ने क्रममा व्यक्तिगत सरसामान सुरक्षित स्थानमा सार्न, अफवाहमा नलाग्न तथा सरकारी अभियानमा सहयोग गर्न स्थानीयवासीलाई आग्रह गरेको छ। साथै नक्कली भूमिहीन पहिचान भएमा कानुनी कारबाही गरिने चेतावनी दिँदै सम्पूर्ण प्रक्रिया संविधान र कानुनअनुसार सञ्चालन हुने स्पष्ट पारेको छ।