विजयी र्‍याली नगर्न रास्वपाको निर्देशन

काठमाडौं । राष्ट्रिय स्वतन्त्र पार्टीका उपसभापति तथा संघीय निर्वाचन सम्पादन समिति संयोजक डिपी अर्यालले पार्टीबाट निर्वाचित हुने उम्मेदवार तथा समर्थकलाई विजयी जुलुस ननिकाल्न आग्रह गरेका छन्। उनले भिडियो सन्देशमार्फत निर्वाचनमा प्राप्त सफलतापछि अबिर जात्रा, उत्सव र विजयी र्‍याली निकाल्ने प्रचलन भए पनि यसपटक त्यस्तो कार्यक्रम नगर्न आग्रह गरेका हुन्।

अर्यालका अनुसार यसपटकको निर्वाचन विशेष परिस्थितिमा सम्पन्न भएको छ। उनले जेनजी उमेर समूहका केही युवाले ज्यान गुमाएको पीडा अझै ताजा रहेको उल्लेख गर्दै यस्तो अवस्थामा उत्सव मनाउने गतिविधि उपयुक्त नहुने बताएका छन्। साथै मध्यपूर्व क्षेत्रमा पछिल्लो समय भएका घटनालाई पनि ध्यानमा राख्दै संयमता अपनाउन उनले आग्रह गरे।

उनले जनताले दिएको मतलाई सरकार सञ्चालन गरी जनताको सेवा गर्ने जिम्मेवारीका रूपमा लिनुपर्ने बताए। मतगणना स्थलमै उपस्थित भएर शुभेच्छुक तथा मतदातालाई धन्यवाद दिन सकिने भए पनि सार्वजनिक रूपमा जुलुस निकाल्न नहुने उनको भनाइ छ।