होटल फरेस्ट इनको आईपीओमा आजदेखि सर्वसाधारणले आवेदन दिन सक्ने

काठमाडौँ । होटल फरेस्ट इन लिमिटेडले आजदेखि सर्वसाधारणका लागि प्राथमिक सेयर (आईपीओ) बिक्री खुला गरेको छ। कम्पनीले पहिलो चरणमा वैदेशिक रोजगारीमा रहेका नेपालीहरूका लागि आईपीओ निष्कासन गरी बाँडफाँट सम्पन्न गरेपछि अब सर्वसाधारणमा सेयर जारी गरेको हो।

नेपाल धितोपत्र बोर्डबाट अनुमति पाएअनुसार होटल फरेस्ट इनले प्रतिकित्ता १०० रुपैयाँ अंकित मूल्यमा कुल ४० लाख कित्ता आईपीओ निष्कासन गर्दैछ। यसमध्ये पहिलो चरणमा वैदेशिक रोजगारीमा रहेका नेपालीहरूका लागि ४ लाख कित्ता सेयर छुट्याइएको थियो।

बाँकी ३६ लाख कित्तामध्ये २ लाख कित्ता सामूहिक लगानी कोषका लागि र ८० हजार कित्ता कम्पनीका कर्मचारीका लागि सुरक्षित गरिएको छ। त्यसपछि बाँकी ३३ लाख २० हजार कित्ता सर्वसाधारण लगानीकर्ताका लागि निष्कासन गरिएको हो।

आईपीओमा आवेदन दिँदा न्यूनतम १० कित्ता र अधिकतम २ लाख कित्तासम्म माग गर्न सकिनेछ। आवेदन अवधि छिटोमा माघ २६ गते र ढिलोमा माघ २८ गतेसम्म तोकिएको छ।

इन्फोमेरिक्स क्रेडिट रेटिङ नेपालद्वारा गरिएको मूल्याङ्कनमा कम्पनीलाई ‘डबल बी माइनस इस्यूअर’ रेटिङ प्रदान गरिएको छ, जसले वित्तीय दायित्व पूरा गर्ने क्षमतामा मध्यम स्तरको जोखिम रहेको संकेत गर्दछ। होटल फरेस्ट इनको धितोपत्र निष्कासन तथा बिक्री प्रबन्धक एनआईसी एसिया क्यापिटल लिमिटेड रहेको छ।