वित्तीय विवादमा जोडिएका अग्रवालको एमाले प्रवेशले चासो,भने ओली पालामा बजारले १० हजार अंक पार गर्छ

काठमाडौँ। शेयर व्यवसायी दीपेन्द्र अग्रवाल नेकपा एमालेमा प्रवेश गरेका छन्। यसअघि जनता समाजवादी पार्टी (जसपा) नेपालका केन्द्रीय सदस्य रहेका अग्रवाललाई एमाले अध्यक्ष केपी शर्मा ओलीले औपचारिक रूपमा पार्टीमा स्वागत गरेका हुन्।

शनिबार ललितपुरको च्यासलस्थित एमाले केन्द्रीय कार्यालयमा आयोजित कार्यक्रममा अध्यक्ष ओलीले खादा र टीका लगाएर अग्रवाललाई पार्टी प्रवेश गराएका थिए। सोही कार्यक्रममा विभिन्न राजनीतिक दल परित्याग गरेका अन्य नेता तथा कार्यकर्ताहरूले पनि एमाले प्रवेश गरेका छन्।

अग्रवालको पार्टी प्रवेशलाई एमालेले संगठन सुदृढीकरणको प्रयासका रूपमा प्रस्तुत गरेको छ। कार्यक्रममा अध्यक्ष ओलीले पार्टीलाई थप सशक्त बनाउने उद्देश्यसहित विभिन्न क्षेत्रका व्यक्तिहरूलाई एमालेमा समेट्ने अभियान जारी रहेको बताएका थिए। ‘…म यति भन्न सक्छु, उहाँकै सरकारको पालामा बजारले १० हजारको इन्डेक्सको यात्रा तय गर्नेछ ।’, अग्रवालले भने ।

तर अग्रवालको प्रवेशलाई लिएर विवादसमेत देखिएको छ। उनी शेयर कारोबारसँग सम्बन्धित विभिन्न वित्तीय अपराधका आरोपमा यसअघि पटक–पटक पक्राउ परेका व्यक्ति हुन्। पछिल्लो पटक गत पुस महिनामा पक्राउ परेका अग्रवाल झण्डै ५० लाख रुपैयाँ धरौटी बुझाएर रिहा भएका थिए।

उनको पृष्ठभूमिलाई लिएर सामाजिक सञ्जाल र राजनीतिक वृत्तमा मिश्रित प्रतिक्रिया देखिन थालेको छ। यस विषयमा एमाले नेतृत्वको औपचारिक धारणा भने सार्वजनिक भइसकेको छैन।