महाधिवेशन मागको दस्तखत बेवास्ता, देउवा समूह रणनीतिक भेलामा

काठमाडौं । नेपाली कांग्रेसभित्र विशेष महाधिवेशन कि नियमित महाधिवेशन भन्ने विषयलाई लिएर देखिएको विवाद थप चर्किँदै गएको छ। विशेष महाधिवेशनको माग गर्दै ५४ प्रतिशतभन्दा बढी महाधिवेशन प्रतिनिधिको दस्तखत पेश गरिएको भए पनि त्यसलाई बेवास्ता गर्दै संस्थापन पक्ष अघि बढेको आरोप लागिरहेका बेला सभापति शेरबहादुर देउवा नेतृत्वको समूहले आज केन्द्रीय सदस्यहरूको भेला बोलाएको छ। पार्टीभित्र बढ्दो असन्तोष र शक्ति संघर्षका बीच संस्थापन पक्षको यो भेला निकै अर्थपूर्ण रूपमा हेरिएको छ।

पार्टीका महामन्त्रीद्वय गगन थापा र विश्वप्रकाश शर्माले यही २६ र २७ गते काठमाडौँको भृकुटीमण्डपमा विशेष महाधिवेशन आह्वान गर्ने घोषणा गरेपछि कांग्रेसभित्रको विवाद सतहमा आएको हो। उक्त घोषणालाई काउन्टर दिन संस्थापन पक्षले आफ्ना केन्द्रीय सदस्यहरूको छुट्टै भेला आयोजना गरेको बुझिएको छ। विशेष महाधिवेशनको मागलाई पार्टी कब्जा गर्ने प्रयासको संज्ञा दिँदै आएको देउवा समूह अहिले आफ्ना समर्थकहरूलाई एकजुट पार्ने रणनीतिमा जुटेको देखिन्छ।

पार्टीभित्र उत्पन्न पछिल्लो परिस्थितिबारे छलफल र आगामी रणनीति तय गर्न बिहान १० बजे आनन्दभूमि पार्टी प्यालेसमा संस्थापन पक्षीय केन्द्रीय सदस्यहरूलाई बोलाइएको छ। भेलामा विशेष महाधिवेशनको माग, संगठनभित्र देखिएको असन्तुलन, नेतृत्वमाथि उठेका प्रश्न तथा भावी राजनीतिक दिशाबारे गम्भीर छलफल हुने बताइएको छ। संस्थापन पक्षले नियमित महाधिवेशन नै पार्टीको वैधानिक र सुरक्षित बाटो भएको दाबी गर्दै आएको छ।

यसअघि बिहीबार संस्थापन पक्षीय पदाधिकारी तथा केन्द्रीय सदस्यहरूले सभापति देउवासँग भेटवार्ता गरेका थिए। सो भेटपछि नै देउवा समूहले आफ्ना समर्थक केन्द्रीय सदस्यहरूको भेला बोलाएको बुझिएको छ। भेटमा पार्टीभित्र बढ्दो असन्तोष, गुटगत गतिविधि र सार्वजनिक रूपमा देखिएको आन्तरिक टकरावबारे छलफल भएको स्रोतको भनाइ छ।

उही दिन वरिष्ठ नेता शेखर कोइरालाले पनि सभापति देउवासँग भेट गरी पार्टीभित्रको विवाद साम्य पार्न पहल गर्न आग्रह गरेका थिए। तर, देउवाले विशेष महाधिवेशनको आवश्यकता नरहेको भन्दै उक्त आग्रह स्वीकार नगरेको बुझिएको छ। यसले कांग्रेसभित्र संस्थापन र इतर समूहबीचको दूरी झनै बढाएको विश्लेषण भइरहेको छ।

पछिल्ला घटनाक्रमले नेपाली कांग्रेसभित्र आन्तरिक लोकतन्त्र, नेतृत्वको वैधता र संगठनात्मक स्थायित्वमाथि गम्भीर प्रश्न खडा गरेको छ। एकातिर बहुमत महाधिवेशन प्रतिनिधिको दस्तखतका आधारमा विशेष महाधिवेशनको माग भइरहेको छ भने अर्कोतर्फ संस्थापन पक्ष त्यसलाई अस्वीकार गर्दै नियमित प्रक्रियामै अघि बढ्नुपर्ने अडानमा छ। आजको केन्द्रीय सदस्य भेलाले कांग्रेसको आगामी राजनीतिक दिशा र आन्तरिक शक्ति सन्तुलनमा महत्वपूर्ण संकेत दिने अपेक्षा गरिएको छ।