मन्त्री गुप्ता: ‘आर्थिक कमजोरीले सरकारलाई अत्यावश्यक काम गर्न कठिन’

काठमाडौँ – युवा तथा खेलकुदमन्त्री बब्लु गुप्ताले सरकार आर्थिक रूपमा कमजोर भएकै कारण आवश्यक भौतिक संरचना निर्माणलगायतका कामहरू समयमै अघि बढाउन नसकिएको बताएका छन्। अन्तर्राष्ट्रिय स्वयंसेवक दिवस–२०२५ को अवसरमा आयोजित सडक दुर्घटना न्यूनीकरण सचेतना स्वयंसेवा कार्यक्रममा बोल्दै मन्त्री गुप्ताले स्रोतसाधनको अभावले सरकारलाई सीमित कार्यसम्पादन गर्न बाध्य बनाएको बताए।

उनका अनुसार ट्राफिक लाइट, लेन व्यवस्थापन तथा अन्य पूर्वाधार विकासका कामहरू सरकारको प्राथमिकतामा परेपनि आर्थिक सीमितताका कारण चाहेको खण्डमा सबै काम सम्पन्न गर्न चुनौती रहेको छ। “हाम्रो स्रोतसाधनले भ्याएसम्म समस्याहरू समाधान गरेर अघि बढ्नु नै अहिलेको विकल्प हो,” मन्त्री गुप्ताले भने।

ट्राफिक प्रहरी, सवारी चालक तथा सडक प्रयोगकर्ताबीच आपसी सकारात्मक दृष्टिकोण स्थापित नहुँदा सडक सुरक्षा अभियान प्रभावकारी हुन नसक्ने भन्दै मन्त्री गुप्ताले व्यवहारिक परिवर्तन अत्यावश्यक रहेकोमा जोड दिए।

खेलकुदमात्र होइन, युवा सम्बन्धी नीति तथा कार्यक्रमलाई पनि समान प्राथमिकताका साथ अघि बढाइने उल्लेख गर्दै उनले आगामी दिनमा युवाको क्षमता विकास, सहभागिता र नेतृत्व सुदृढीकरणमा मन्त्रालयले विशेष ध्यान केन्द्रित गर्ने बताए।