प्रधानमन्त्री कार्कीविरुद्धकाे अवहेलना मुद्दा न्यायाधीश फुयाँल र मुसलमानको इजलासमा

काठमाडौँ । प्रधानमन्त्री सुशीला कार्कीले सर्वोच्च अदालतको आदेश नमानिएको आरोपमा परेका ‘अदालत अवहेलना’ सम्बन्धी मुद्दामा अब सुनुवाइ हुने भएको छ। सर्वोच्च अदालतले मंसिर ३ गते कार्कीविरुद्ध दर्ता भएको मुद्दामा सुनुवाइ गर्न मिति तोकेको हो।

यो मुद्दा सरकारले केही समयअघि ११ देशका राजदूतलाई फिर्ता बोलाउने निर्णय गर्दा सर्वोच्च अदालतले दिएको अन्तरिम आदेश नमानिएको भन्दै दायर गरिएको हो। अधिवक्ता प्रतिभा उप्रेती र प्रेम सिलवालले अदालतमा निवेदन दिएका छन्। उक्त निवेदनको सुनुवाइ न्यायाधीश हरिप्रसाद फुयाँल र न्यायाधीश अब्दुल अजिज मुसलमानको संयुक्त इजलासमा हुने भएको छ।

यसअघि, सर्वोच्च अदालतले गत कात्तिक १६ गते राजदूत फिर्ता बोलाउने सरकारी निर्णयलाई तत्काल रोक्न अन्तरिम आदेश दिएको थियो। तर त्यही आदेश पालना नभएको आरोपसहित अहिले अवहेलना मुद्दा चलेको हो।