कामना सेवा बैंकले कमायो १९ करोड नाफा, कर्जा प्रवाह ५३ अर्ब नाघ्यो

काठमाडौं। कामना सेवा विकास बैंक लिमिटेडले आर्थिक वर्ष २०८२/८३ को पहिलो त्रैमासिक अपरिष्कृत वित्तीय विवरण सार्वजनिक गरेको छ। प्रकाशित विवरण अनुसार, बैंकले समीक्षा अवधिसम्म ६३ अर्ब ७८ करोड रुपैयाँ निक्षेप संकलन गर्दै ५३ अर्ब ४५ करोड रुपैयाँ कर्जा प्रवाह गरेको छ।

बैंकले पहिलो त्रैमासको अन्त्यसम्म १९ करोड ७६ लाख रुपैयाँ खुद नाफा आर्जन गर्न सफल भएको छ। सो अवधिमा बैंकको कर्जा–निक्षेप अनुपात (CD Ratio) ८६.३५ प्रतिशत रहेको छ। त्यस्तै, बैंकको निष्क्रिय कर्जा अनुपात (NPL Ratio) ४.४१ प्रतिशत रहेको उल्लेख छ।

वित्तीय विवरण अनुसार, बैंकको कुल सम्पत्ति ७१ अर्ब ६३ करोड रुपैयाँ पुगेको छ। यसले गत वर्षको सोही अवधिको तुलनामा बैंकको सम्पत्ति तथा कर्जा विस्तारमा सकारात्मक वृद्धिदर देखाएको छ।

कामना सेवाले हालै नेपालकै बैंकिङ इतिहासमा पहिलोपटक ‘डोरस्टेप बैंकिङ’ सेवा सार्वजनिक गर्दै नयाँ डिजिटल बैंकिङ अध्याय सुरु गरेको थियो। यो सेवामार्फत ग्राहकहरूले घरमै बसेर डिजिटल माध्यमबाट आवश्यक बैंकिङ कारोबार गर्न सक्ने व्यवस्था गरिएको छ।

त्यसअघि सम्पन्न बैंकको १९औं वार्षिक साधारण सभाले आर्थिक वर्ष २०८१/८२ को संचित मुनाफाबाट आफ्ना शेयरधनीहरूलाई १५.७८९५ प्रतिशत लाभांश वितरण गर्ने प्रस्ताव पारित गरेको थियो। बैंकले डिजिटल रूपान्तरण, ग्राहक सन्तुष्टि र नवप्रवर्तनशील बैंकिङ सेवाका माध्यमबाट प्रतिस्पर्धात्मक बजारमा आफ्नो उपस्थितिलाई अझ सुदृढ बनाउने लक्ष्य लिएको जनाएको छ।