बाढीपहिरोका कारण देशका मुख्य राजमार्ग पूर्ण रूपमा बन्द

काठमाडौं — देशका विभिन्न ठाउँमा परेको अविरल वर्षाका कारण पहिरो र बाढी आएको छ, जसले गर्दा मुख्य पाँचवटा राजमार्ग पूर्ण रूपमा बन्द भएका छन्।

प्रहरी प्रधान कार्यालयका अनुसार, पहिरोका कारण सङ्खुवासभाको भोटखोला गाउँपालिका–४ र मकालु गाउँपालिका–३ मा पर्ने कोशी राजमार्ग दुबै ठाउँमा पूर्ण रूपमा अवरुद्ध भएको छ।

त्यस्तै, रसुवाको गोसाइँकुण्ड गाउँपालिका–२ मा रहेको पासाङल्हामु राजमार्ग अन्तर्गत नेपाल–चीन जोड्ने मितेरी पुल क्षेत्र, चितवनको इच्छाकामना गाउँपालिका–५ मा पर्ने मुग्लिङ–नारायणघाट सडकखण्ड, र रुकुम पूर्वको भूमे गाउँपालिका–४ मा पर्ने मध्यपहाडी लोकमार्ग पनि बन्द छन्।

केन्द्रीय प्रहरी प्रवक्ता विनोद घिमिरेका अनुसार यी सबै सडकहरूमा ठूलो पहिरो खसेको वा सडक बगाएको कारण सवारी आवागमन ठप्प भएको हो।

तर केही सडकहरू एकतर्फी रूपमा खुलेका छन्। जस्तै, नवलपरासी पूर्वको पूर्व–पश्चिम राजमार्ग, बाग्लुङको कालिगण्डकी करिडोर, र रसुवाको त्रिशुली–मैलुङ सडक एकतर्फी रूपमा सञ्चालनमा छन्।

प्रहरीले जनतालाई आवस्यक नपरी ती क्षेत्रहरूमा नजान अनुरोध गरेको छ र सडक खुलाउने प्रयास भइरहेको जनाएको छ।