काठमाडौँ–धनगढी हवाई भाडा दसैं नजिकिँदै जाँदा आकस्मिक रूपमा बढ्यो

धनगढी । दशैं नजिकिँदै जाँदा काठमाडौँ–धनगढी हवाई भाडा एक्कासि चर्किएको यात्रुहरूले गुनासो गरेका छन्। सामान्य अवस्थामा करिब साढे सात हजार रुपैयाँ पर्ने हवाई टिकट अहिले चाडपर्वको चाप बढेसँगै १२ हजार रुपैयाँभन्दा कममा पाउन नसकिने अवस्था आएको यात्रुहरूको भनाइ छ।

धनगढीका खगेन्द्र साउदले विमान कम्पनीहरूले चाडपर्वको मौका छोपेर मनपरी भाडा असुल्न थालेको आरोप लगाएका छन्। “अरू बेला साढे सात हजारमा उडाइने टिकट अहिले १६ हजार रुपैयाँसम्म पुगेको छ। नियमन गर्ने सरकारी निकाय भने मौन छन्,” उनले बताए।

धनगढी विमानस्थल कार्यालयका प्रमुख बालकुमार सिंहका अनुसार हाल काठमाडौँ–धनगढी मार्गमा दैनिक आठवटा उडान सञ्चालन भइरहेका छन्। तीमध्ये छ उडान श्री एयरलाइन्सका र बाँकी दुई उडान बुद्ध एयरका छन्।

विमानस्थल स्रोतका अनुसार चाडपर्वको समयमा यात्रुको चाप अत्यधिक हुने भएकाले टिकटको माग उच्च छ। यो मागको फाइदा उठाउँदै केही निजी विमान कम्पनीहरूले टिकटमा अनियन्त्रित मूल्य वृद्धि गरेको देखिन्छ।

यात्रुहरू मूल्यवृद्धिबाट हैरान भए पनि नियामक निकाय नागरिक उड्डयन प्राधिकरणले हालसम्म मूल्य निर्धारण र निगरानीमा कुनै स्पष्ट कदम चालेको देखिँदैन।

चाडपर्वको समयमा हवाई सेवा आम यात्रुका लागि सहज बनाउने विषयमा सम्बन्धित निकायले चासो दिनुपर्ने माग बढ्दो छ।