षड्यन्त्रमा नफसी गाउँगाउँमा चुनावी तयारीमा लागौं:डा. सिके राउत

काठमाडौँ — जनमत पार्टीका अध्यक्ष डा. सिके राउतले पार्टीभित्र केही गतिविधि नेता-कार्यकर्ताको ध्यान भटकाउने र थकाउने षड्यन्त्रका रूपमा भइरहेको बताएका छन्। उनले सामाजिक सञ्जालमार्फत निर्वाचन नजिकिँदै गर्दा यस्ता विवादमा समय नखेरिन कार्यकर्तालाई आग्रह गरेका छन्।

राउतले फागुन २१ गते चुनाव मिति तोकिएको बताउँदै अब समय निकै सीमित भएको र सबै दल तयारीमा जुटिसकेका कारण जनमत पार्टीले पनि पहिलो नम्बरको पार्टी बन्ने लक्ष्यसहित काम गर्नुपर्ने बताएका छन्। उनका अनुसार चुनावको तयारी गर्न अब झन्डै साढे ५ महिना मात्र बाँकी छ, त्यसैले गाउँ-टोलसम्म पुगेर प्रचारप्रसारमा जुट्न सबै कार्यकर्तालाई आह्वान गरेका छन्।

उनले यो चुनाव जनमत पार्टीका लागि “महाभारत” र “अग्निपरीक्षा” भएको उल्लेख गर्दै बूथ समिति, युवा दस्ता गठन गर्न, तालिम दिन र चुनाव कसरी जित्ने भन्ने योजनामा लाग्न निर्देशन दिएका छन्।

राउतले अन्तिममा भने, “निर्वाचनपछि अरु सबै कुरा छलफल गर्न पाइन्छ, तर अहिले हाम्रो लक्ष्य मधेशमा जित हासिल गर्दै देशभर निर्णायक शक्ति बन्ने हो।”