आईटी क्षेत्रमा काम गर्ने दक्ष जनशक्तिलाई २ लाख रुपैयाँसम्म तलब : प्रधानमन्त्री ओली

काठमाडौँ — प्रधानमन्त्री केपी शर्मा ओलीले सूचना प्रविधि (आईटी) क्षेत्रमा काम गर्ने योग्य जनशक्तिलाई मासिक २ लाख रुपैयाँसम्म तलब दिने व्यवस्था सरकारले गर्ने बताएका छन्।

बिहीबार बिहान उनले सामाजिक सञ्जालमार्फत यस्तो जानकारी दिएका हुन्। उनका अनुसार अबदेखि आईटी क्षेत्रमा दक्ष जनशक्तिलाई राम्रो तलब दिइनेछ, जसले गर्दा सरकारी सेवाहरू अनलाइनमार्फत सजिलै दिने काममा ढिलासुस्ती, घुस र कमिसनजस्ता गलत कामहरू घट्नेछन्।

प्रधानमन्त्री ओलीले भनेका छन्, “यसले दक्ष जनशक्ति विदेश जानबाट रोक्न सहयोग गर्छ र सफ्टवेयर बनाउन कति खर्च लाग्छ भन्ने कुराको सही अनुमान पनि गर्न सजिलो हुन्छ।”

आईटी पढेका र यो क्षेत्रमा काम गर्न चाहने युवाहरूका लागि यो राम्रो अवसर हुने प्रधानमन्त्रीको विश्वास छ।