१७औं नाडा अटो शो २०२५ उद्घाटन गर्न प्रधानमन्त्री ओलीलाई औपचारिक निमन्त्रणा

काठमाडौं। नाडा अटोमोबाइल्स एशोसिएसन अफ नेपाल (नाडा) का अध्यक्ष करण चौधरीको नेतृत्वमा गएको एक प्रतिनिधिमण्डलले प्रधानमन्त्री केपी शर्मा ओलीसँग भेट गरी आगामी भदौ ३ देखि ८ गतेसम्म काठमाडौंको भृकुटीमण्डपमा आयोजना हुने १७औं संस्करणको नाडा अटो शो २०२५ उद्घाटन गर्न प्रमुख अतिथिको रूपमा उपस्थित रहन औपचारिक आग्रह गरेको छ।

अध्यक्ष चौधरीले भेटका क्रममा नाडा स्थापना भएको ५०औं वार्षिकोत्सवको अवसरमा यो संस्करण विशेष रूपमा आयोजना गरिन लागेको जानकारी गराए। उनका अनुसार, यस वर्षको अटो शोमा १२५ भन्दा बढी प्रदर्शक र ३० भन्दा बढी सवारी साधनका ब्रान्डहरू सहभागी हुनेछन्। इलेक्ट्रिक, हाइब्रिड तथा स्मार्ट मोबिलिटी समाधानसँगै विंटेज मोटर शो, नेपालमै पहिलोपटक प्रदर्शित हुने UNITREE रोबोट्स र Deepal eVTOL UAV जस्ता अत्याधुनिक प्रविधि पनि प्रदर्शनीको मुख्य आकर्षण हुनेछन्।

प्रधानमन्त्री ओलीले नाडाको निमन्त्रणा सहर्ष स्वीकार गर्दै उद्घाटन समारोहमा सहभागी हुने प्रतिवद्धता जनाएका छन्। नाडाका प्रतिनिधिहरूका अनुसार, यसबाट अटोमोबाइल व्यवसायीहरूलाई थप उत्साह र प्रेरणा मिलेको छ।

भेटघाटमा नाडाका उपाध्यक्ष राजनबाबु श्रेष्ठ, महासचिव सुरेन्द्रकुमार उप्रेती, सचिव विक्रम सिंहानिया, कोषाध्यक्ष मिलनबाबु मल्ल, सहकोषाध्यक्ष पंकज अग्रवाल र केन्द्रीय कार्य समिति सदस्य मेघराज पौडेलको पनि उपस्थिति थियो।