सडक पूर्वाधार विना अटोमोबाइल क्षेत्रको दिगो विकास सम्भव छैन : अर्थमन्त्री पौडेल

काठमाडौं । उपप्रधान तथा अर्थमन्त्री विष्णुप्रसाद पौडेलले दिगो अटोमोबाइल क्षेत्रको विकासका लागि सडक पूर्वाधार अपरिहार्य रहेको बताएका छन्। ‘नाइमा नेपाल मोबिलिटी एक्स्पो २०२५’ को उद्घाटन समारोहमा बोल्दै उनले सरकारले गुणस्तरीय र दिगो सडक पूर्वाधार निर्माणमा विशेष ध्यान दिएको स्पष्ट पारे।

उनका अनुसार, पूर्व–पश्चिम राजमार्गलाई एक्स्प्रेस हाईवेको रूपमा स्तरोन्नति गर्ने कार्य तीव्र गतिमा अघि बढिरहेको छ। काकडभिट्टादेखि गड्डाचौकीसम्मको खण्डमा एक्स्प्रेस हाईवे निर्माण प्रारम्भ भइसकेको जानकारी दिँदै उनले हुलाकी राजमार्ग, मध्यपश्चिम लोकमार्ग, मदन भण्डारी राजमार्ग, काठमाडौं–निजगढ फास्ट ट्र्याक तथा अन्य कोरिडोरहरू पनि तीव्र गतिमा निर्माणाधीन रहेको बताए।

अर्थमन्त्री पौडेलले भृकुटीमण्डपलाई अन्तर्राष्ट्रिय स्तरको आधुनिक प्रदर्शनी केन्द्रमा रूपान्तरण गर्न चालु आर्थिक वर्षको बजेटमार्फत व्यवस्था गरिएको जानकारी दिए। “विगतमा एक्स्पो आयोजना गर्दा व्यवसायीहरूले भोग्नुपरेको हैरानी समाधान गर्नका लागि अबका तीन वर्षभित्र आकर्षक र सुविधासम्पन्न प्रदर्शनी स्थल निर्माण हुनेछ,” उनले भने। उनका अनुसार, भृकुटीमण्डपमा अवस्थित सबै संरचनाहरू हटाएर नयाँ डिजाइनअनुसार ग्लोबल टेन्डरमार्फत निर्माण कार्य अघि बढाइनेछ।

एक्स्पो आयोजक संस्था नेपाल अटोमोबाइल इम्पोर्टर्स एन्ड म्यानुफ्याक्चरर्स एशोसिएसन (नाइमा) का अनुसार, यस वर्षको ‘मोबिलिटी एक्स्पो’ मा ५० भन्दा बढी राष्ट्रिय तथा अन्तर्राष्ट्रिय अटोमोबाइल ब्रान्डहरूको सहभागिता रहेको छ। जसअन्तर्गत ३५ नयाँ मोडल सार्वजनिक गरिनेछ — १५ दुईपांग्रे, १५ चारपांग्रे र ५ व्यावसायिक सवारी साधनहरू।

यस प्रदर्शनीमा विद्युतीय, इन्धनचालित र हाइब्रिड सवारी साधनहरू प्रदर्शनमा राखिने छन्, यद्यपि सवारीका पार्टपुर्जाहरू भने समावेश गरिने छैन। आयोजकले करिब ७० देखि ८० हजार दर्शकले एक्स्पो अवलोकन गर्ने अनुमान गरेका छन्।