एनआईसी एशिया बैंकद्वारा ‘एथोट लोन अगेंस्ट सेयर’ योजना सार्वजनिक,३ कार्यदिनमै कर्जा स्वीकृति

काठमाण्डौ।बैंक पनि साथी पनि, राम्रो पनि हाम्रो पनि’ भन्ने मूल नाराका साथ सेवा विस्तार गरिरहेको एनआईसी एशिया बैंकले ‘NIC ASIA ATHOT Loan Against Share’ नामक नयाँ कर्जा योजना सार्वजनिक गरेको छ। गतिशील, उत्तरदायी र ग्राहककेन्द्रित बैंकिङ अभ्यासमार्फत लाखौं ग्राहक माझ विश्वास आर्जन गरिसकेको बैंकले शेयर बजारप्रति बढ्दो चासोलाई सम्बोधन गर्न यो योजना ल्याएको हो।

बैंकले प्रतिस्पर्धी ब्याजदरमा कर्जा उपलब्ध गराउने नीति अनुरूप, औसत आधार दरमा १ प्रतिशत प्रिमियम थप गरी सेयर धितोमा कर्जा प्रवाह गर्ने घोषणा गरेको छ। यस योजनाअन्तर्गत नेपाल स्टक एक्सचेन्जमा सूचीकृत बैंक तथा वित्तीय संस्था, बीमा कम्पनीसहितका विभिन्न कम्पनीहरूको साधारण शेयर धितो राखी न्यूनतम रु. ५० लाखदेखि अधिकतम रु. १५ करोडसम्म कर्जा लिन सकिने व्यवस्था गरिएको छ। धितो मूल्यांकनको सन्दर्भमा १८० दिनको औसत बजार मूल्य वा पछिल्लो कारोबार मूल्यमध्ये जुन कम हुन्छ, त्यसको ७० प्रतिशतसम्म कर्जा प्राप्त गर्न सकिनेछ।

आर्थिक रुपमा सचेत र कर्जा सेवामा पहुँच वृद्धि गर्न लक्ष्य लिएको बैंकले कर्जा प्रक्रिया सहज बनाउन तीन कार्य दिनभित्र कर्जा स्वीकृत गर्ने आन्तरिक व्यवस्थापनसमेत सुनिश्चित गरेको छ। यस योजनाको प्रभावकारिता र ग्राहक सेवा सुदृढ गर्न बैंकले ‘कर्जा सहायता केन्द्र’ स्थापना गरेको छ, जसले कर्जा सम्बन्धी परामर्श, गुनासो तथा जिज्ञासाको एकद्वार प्रणालीमार्फत समाधान दिने उद्देश्य बोकेको छ।

एनआईसी एशिया बैंकको यो पहलले नेपाली शेयर बजारमा कर्जाको पहुँच र लचिलोपन बढाउने विश्वास लिइएको छ। ग्राहक हितलाई केन्द्रमा राखी ल्याइएको यो योजना बैंकको रणनीतिक, नविन र प्रतिस्पर्धात्मक सेवा प्रवाहको एक महत्वपूर्ण उदाहरणका रुपमा हेरिएको छ।