रसुवागढी–केरुङ प्रसारण लाइन अध्ययनसहित चार समझदारीपत्रमा हस्ताक्षर

काठमाण्डौ। चीनको अन्तरराष्ट्रिय विकास सहायता नियोग (सिड्का) का अध्यक्ष चेन सियाओदोङ्ग नेतृत्वको प्रतिनिधिमण्डलले प्रधानमन्त्री केपी शर्मा ओलीसँग शिष्टाचार भेट सम्पन्न गरेको छ। प्रधानमन्त्री निवास बालुवाटारमा भएको भेटमा दुई देशबीचको आपसी सम्बन्ध, पछिल्लो समय अर्थ मन्त्रालयमा सम्पन्न द्विपक्षीय समझदारी र उच्चस्तरीय भ्रमणका अवसरमा गरिएका विकास सहकार्यका सम्झौताको कार्यान्वयनसम्बन्धी विषयमा विस्तृत छलफल भएको प्रधानमन्त्री सचिवालयले जनाएको छ।

प्रधानमन्त्री ओलीले नेपाल र चीनबीचको दीर्घकालीन मैत्रीपूर्ण सम्बन्धलाई उल्लेख गर्दै नेपाल एक चीन नीतिप्रति निरन्तर प्रतिबद्ध रहेको धारणा व्यक्त गराएका थिए। रसुवागढीस्थित अन्तरदेशीय नाकामा हालैको आकस्मिक बाढीका कारण पुगेको क्षतिको पुनर्निर्माणमा प्राथमिकता दिएकोप्रति चीन सरकारप्रति धन्यवाद व्यक्त गर्दै उनले नेपाली पक्षले पनि आवश्यक तत्परतासाथ सहयोग प्रदान गरिसकेको जानकारी गराएका थिए। साथै, चीनसँगको किमाथाङ्कालगायतका अन्य नाका सञ्चालनमा ल्याई नेपाललाई भूपरिवेष्टित अवस्थाबाट भूजडित बनाउने लक्ष्यलाई साकार पार्न ‘बेल्ट एन्ड रोड इनिसियटिभ फ्रेमवर्क’ अन्तर्गतका परियोजनाहरूलाई अबरोधबिना अघि बढाउनुपर्नेमा जोड दिइएको थियो।

भेटवार्ताका क्रममा प्रधानमन्त्रीका मुख्य सल्लाहकार विष्णुप्रसाद रिमाल, आर्थिक सल्लाहकार डा. युवराज खतिवडा, नेपालका लागि चिनियाँ राजदूत चेन सोङ, तथा परराष्ट्र मन्त्रालयका उच्च अधिकारीहरू समेत उपस्थित रहेका थिए। सोही अवसरमा प्रतिनिधिमण्डलले चिनियाँ सहयोगमा सञ्चालनमा रहेका र भविष्यमा प्रस्तावित परियोजनाहरूका सन्दर्भमा उपप्रधानमन्त्री एवं अर्थमन्त्री विष्णुप्रसाद पौडेलसँग समेत छलफल सम्पन्न गरेको थियो।

यसबाहेक, चितवनस्थित बिपी कोइराला मेमोरियल क्यान्सर अस्पतालमा बोनम्यारो ट्रान्सप्लान्टेसन परियोजनाका लागि र निजामती कर्मचारी अस्पतालको विस्तारको सम्भाव्यता अध्ययनसम्बन्धी समझदारीपत्रमा हस्ताक्षर भइसकेको थियो। यस्तै, मानव संसाधन विकाससम्बन्धी समझदारीपत्र र रसुवागढी–केरुङ अन्तरदेशीय विद्युत् प्रसारण लाइन निर्माणसम्बन्धी सम्भाव्यता अध्ययनको माइन्युटमा समेत हस्ताक्षर सम्पन्न भएको थियो।