राष्ट्रिय वाणिज्य बैंकको सञ्चालक समितिको अध्यक्षमा देव कुमार ढकाल नियुक्त

काठमाडौं । नेपालका अग्रणी वाणिज्य बैंकहरूमध्ये एक राष्ट्रिय वाणिज्य बैंक लिमिटेड (RBBL) को सञ्चालक समितिको अध्यक्षमा देव कुमार ढकाल नियुक्त भएका छन्। साउन २ गते शुक्रबार बसेको सञ्चालक समितिको बैठकले सर्वसम्मतरूपमा ढकाललाई अध्यक्ष चयन गरेपछि उहाँले पदभार ग्रहण गर्नुभएको हो।

ढकालसँग नेपाल राष्ट्र बैंकमा ३० वर्षभन्दा बढी समय विभिन्न जिम्मेवारीमा रही काम गरेको अनुभव रहेको छ। पछिल्लो समय उहाँ राष्ट्र बैंकको कार्यकारी निर्देशकका रूपमा कार्यरत रहनुभएको थियो। उहाँ वित्तीय प्रणाली, बैंकिङ प्रशासन तथा नियमन प्रणालीको गहिरो ज्ञान राख्ने अनुभवी व्यक्तित्वका रूपमा चिनिन्छन्।

पदभार ग्रहण कार्यक्रममा ढकाललाई बैंक सञ्चालक समिति सदस्यहरू महेश भट्टराई, लक्ष्मण घिमिरे, प्रा.डा. रामप्रसाद ज्ञवाली, रोमिला ढकाल उप्रेती, डा. सूर्य बहादुर राना, प्रमुख कार्यकारी अधिकृत देवेन्द्र रमण खनाल, कम्पनी सचिव प्रमोद अधिकारी लगायत बैंकका वरिष्ठ व्यवस्थापन टोली तथा कर्मचारीहरूले स्वागत गरेका थिए।

विसं २०२२ मा स्थापना भएको राष्ट्रिय वाणिज्य बैंकले हाल ७७ वटै जिल्लामा फैलिएको ३०९ शाखा कार्यालयमार्फत करिब ४७ लाखभन्दा बढी सेवाग्राहीहरूलाई सेवा प्रदान गर्दै आएको छ। बैंकले सेवा प्रवाहलाई समय सापेक्ष बनाउँदै प्रविधिमैत्री वित्तीय समावेशीकरण र दिगो बैंकिङ सेवा विकासमा विशेष ध्यान दिइरहेको जनाएको छ।