भिजिट भिसा दुरुपयोग र मानव तस्करी प्रकरणमा डिपी अर्यालविरुद्ध प्रधानमन्त्री कार्यालयमा उजुरी

काठमाडौं । राष्ट्रिय स्वतन्त्र पार्टी (रास्वपा) का कार्यवाहक सभापति डोलप्रसाद अर्याल (डिपी)विरुद्ध भिजिट भिसाको दुरुपयोग र मानव तस्करीको आशंकामा छानबिनको माग गर्दै प्रधानमन्त्री तथा मन्त्रिपरिषद् कार्यालयमा औपचारिक उजुरी दर्ता गरिएको छ।

उक्त उजुरी सामाजिक अभियन्ता युवराज सफलले दर्ता गराएका हुन्। उनले प्रतिनिधिसभाको गत असार १५ गतेको बैठकमा सांसद अर्यालले सुमिरे टुर्स एण्ड ट्राभल्स प्रा.लि. को सञ्चालक रहेको र आफू वर्षौँदेखि जापानमा भिजिट भिसामा नेपाली नागरिक पठाउँदै आएको स्वीकारेको प्रसंग उल्लेख गर्दै उजुरी पेश गरेका हुन्।

सफलले अर्यालको सदनमा दिएको अभिव्यक्तिलाई आधार मानेर, उनको कम्पनीमार्फत विदेश पठाइएका व्यक्तिहरूको प्रक्रिया, कागजात र वैधानिकताको गम्भीर अध्ययन आवश्यक रहेको तर्क गरेका छन्।

उजुरीमा उल्लेख गरिएको छ, “भिजिट भिसाको नाममा ‘सेटिङ’ मिलाएर त्रिभुवन अन्तर्राष्ट्रिय विमानस्थल हुँदै नागरिकहरू विदेश पठाइएको प्रमाणहरू सार्वजनिक भइसकेका छन्। यस्तो अवस्थामा अर्यालको कम्पनीले आवश्यक कानुनी प्रक्रिया पूरा गरेर नागरिक पठाएको ठोकुवा गर्न सकिन्न।”

सफलले सांसद अर्यालसहित कम्पनीका अन्य सञ्चालकलाई समेत कानुनी दायरामा ल्याई दोषी ठहरिए कडा कारबाही गर्न माग गरेका छन्। तर, प्रधानमन्त्री तथा मन्त्रिपरिषद् कार्यालयले यस विषयमा हालसम्म कुनै धारणा सार्वजनिक गरेको छैन।

यस प्रकरणले रास्वपाको नेतृत्व तहप्रति नै प्रश्न उठाएको छ भने राजनीतिक क्षेत्रमै भिजिट भिसाको आडमा भइरहेका आपराधिक गतिविधिहरूप्रति गम्भीर चासो थपिएको देखिएको छ।