तीनकुने घटनाको जिम्मेवारी पूर्व राजा ज्ञानेन्द्र शाहले लिनुपर्छ: प्रधानमन्त्री ओली

काठमाडौँ, १८ चैत । प्रधानमन्त्री केपी शर्मा ओलीले तीनकुने घटनाको जिम्मेवारी पूर्व राजा ज्ञानेन्द्र शाहले लिनुपर्ने बताएका छन्। सोमबारको प्रतिनिधि सभा बैठकमा सम्बोधन गर्दै उनले चैत १५ को आपराधिक घटनामा संलग्न कसैले पनि उन्मुक्ति नपाउने बताएका छन्। यसमा तत्कालीन राजा शाहले पनि उन्मुक्ति पाउनु हुँदैन भने उनले थपे।

प्रधानमन्त्री ओलीले भने, “फेरि राजा बन्ने, व्यवस्था मच्चाउने भनिएका व्यक्तिहरूले यी शृंखलाबद्ध घटनाहरूमा आफ्नो धारणा सार्वजनिक गर्नुपर्छ।” उनले सो दिनका सबै गतिविधिहरू निन्दनीय र खेदजनक भएको टिप्पणी गरे।

उनले पनि स्पष्ट पारे कि, “यस्ता घटनामा संलग्नलाई जुनसुकै तरिकाले भए पनि कडा प्रशासनिक कारबाही गरिनेछ।” प्रधानमन्त्री ओलीले इतिहासको कुनामा फ्याँकिएका व्यक्तिहरूसँग मिलेर घटाइएका हिंस्रक घटनामा संलग्न सबैलाई कडा कारबाहीको धम्की दिए।

“मानिसलाई मर्न उक्साउने जनकमाण्डर, इतिहासले कुनामा फ्याँकिएका व्यक्ति अभियानका संयोजक, धनजनको क्षति र लुटपाट गर्ने, शासक बन्ने मनसुवा राख्ने व्यक्ति कसरी सिरक भित्र चुपचाप रहन सक्छ?” प्रधानमन्त्री ओलीले सोधेका थिए। उनले थपे, “यी सबै घटनाहरूको मुख्य जिम्मेवार पूर्व राजा नै हुन् र उनले नै यसको जिम्मेवारी लिनुपर्छ।” साथै, प्रधानमन्त्री ओलीले एक वर्षदेखि संविधान र सरकारमाथि बारम्बार प्रहार भइरहेको बताएका छन्।

उनले पूर्वराजा शाहले भिडियो वक्तव्य जारी गरी भीड उक्साउने काम गरेको समेत आरोप लगाए । प्रधानमन्त्री ओलीले व्यवस्था मासेर फेरि राजा बन्छु भन्नेले उश्रृंखल श्रृंखलावद्ध घटनामा आफ्नो धारणा सर्वजनिक गर्नु पर्दैन ? भन्दै प्रश्न समेत गरे । प्रधानमन्त्री ओलीले पूर्वराजाविरुद्ध अभिव्यक्ति दिँदा राप्रपा सांसदहरुले सभामा उठेर बिरोध जनाएका छन् ।