जनप्रतिनिधिहरुले जनताको गुनासो सुनेर त्यसको समाधानमा ध्यान दिनुपर्छ: उपप्रधानमन्त्री सिंह

काठमाडौँ , २५ माघ । उपप्रधानमन्त्री तथा सहरी विकास मन्त्री प्रकाशमान सिंहले जनप्रतिनिधिहरुले अनावश्यक रुपमा जनतालाई दुःख दिने कार्यको अन्त्य गर्नुपर्ने बताएका छन्। उनले शुक्रवार काठमाडौं महानगरपालिका वडा नं २९ को प्रशासनिक भवन उद्घाटन समारोहमा जनप्रतिनिधिहरुले जनताको गुनासो सुनेर त्यसको समाधानमा ध्यान दिनुपर्ने बताएका छन्। उनले भने, “जनताले समस्या राखिसकेपछि समाधान दिनु पर्छ, अनावश्यक दुःख दिन पाइँदैन।” सिंहले सरकारप्रति उठेका प्रश्नहरूको जवाफ दिने क्रममा भने, “कांग्रेस र एमाले मिलेर अहिले जुन सरकार बनेको छ, त्यो जनताको चाहना हो।”

उनले स्थायी सरकार बनाउने उद्देश्यले वर्तमान सरकार गठन भएको पनि बताए। साथै, उनले नेपालमा राम्रो काम गर्न कठिनाइहरूको सामना गर्नुपर्ने चर्चा गर्दै वडाको भवन आफ्नै वडामा निर्माण गर्न विवाद उठेको सम्झाए।