एमालेको लोकप्रियता घटाउन विरोधीहरु निरन्तर कोशिशमा छन्:प्रधानमन्त्री ओली

काठमाडौं, पुस २१ । प्रधानमन्त्री एवम् नेकपा ९एमाले० का अध्यक्ष केपी शर्मा ओलीले देशभक्त, प्रगतिशील र जनवादी शक्तिहरु मजबुत भएका कारण मुलुकका प्रतिक्रियावादी शक्तिहरु आतङ्कित भएको बताएका छन् । च्यासलमा सुरु भएको एमालेको केन्द्रीय कमिटीको आठौँ बैठकलाई सम्बोधन गर्दै अध्यक्ष ओलीले प्रतिक्रिया दिने पक्षहरुले झुटा प्रचार गर्दै एमालेविरुद्ध संघर्ष गरिरहेको टिप्पणी गरे । उनले एमालेको लोकप्रियता घटाउन विरोधीहरुले निरन्तर कोशिश गरिरहेको र पार्टीको सही नीतिका आधारमा एकताबद्ध भएर जनस्तरमा पार्टीलाई मजबुत बनाउन आग्रह गरे ।

अध्यक्ष ओलीले पार्टीभित्र गुटबन्दी र अराजकता अन्त्य गर्नुपर्नेमा जोड दिँदै लोकतन्त्रको नाममा पार्टीलाई कमजोर पार्ने कुनै कार्य गर्न नहुने बताए । उनले पार्टीको आन्तरिक समस्यालाई सार्वजनिक नगरी र विभाजनको प्रयास नगरी एकतामा बस्नुपर्ने धारणा व्यक्त गरे ।

बैठकमा अध्यक्ष ओलीले ४३ पृष्ठको राजनीतिक प्रतिवेदन प्रस्तुत गर्दै नयाँ राजनीतिक कोर्स, एमाले र काङ्ग्रेसको गठबन्धनको आवश्यकता, अस्थिरता र सुधारका विषयमा विचार प्रस्तुत गरे । उनले सरकारका प्रमुख उपलब्धिहरुमा अर्थतन्त्रको सुधार र विकास निर्माणमा प्रगति भएको उल्लेख गरे ।