सिरहामा पुल निर्माणको माग: अनसनकारीको समर्थनमा विभिन्न संघ-संस्थाले ऐक्यबद्धता जनाए

जनकपुरधाम – मधेश प्रदेश सरकारका मुख्यमन्त्री कार्यालय अगाडि ३० घण्टाको धर्ना पश्चात् अनसनकारीहरूको समर्थनमा विभिन्न संघ-संस्थाहरू र पेसागत संगठनहरूले ऐक्यबद्धता जनाएका छन्। विभिन्न सामाजिक संस्था र नागरिक समाजका संगठनहरूले प्रेस विज्ञप्ति जारी गर्दै समर्थन जनाएका छन्।

सिरहा जिल्ला अदालत बार एशोसिएसनका अध्यक्ष मनद कुमार साहको नेतृत्वमा अधिवक्ताहरूको टोलीले जिल्ला प्रशासन कार्यालय सिरहामार्फत मधेश प्रदेशका मुख्यमन्त्री सतिश कुमार सिंहलाई अनसनकारीहरूको समर्थनमा पत्र पठाएका छन्।

हिजो बुधबार साँझ, पुल निर्माणमा ढिलाइको विरोधमा सिरहा सदरमुकाममा प्रधानमन्त्री केपी शर्मा ओली र मुख्यमन्त्री सतिश कुमार सिंहको पुतला दहन गरिएको छ। प्रदर्शनकारीहरूले अनसनकारीहरूको जीवनमा कुनै पनि खतरा आएमा आन्दोलनको आँधीबेहरी उठ्ने चेतावनी दिएका छन्। साथै, उनीहरूले सिरहाका सांसदहरूलाई सिरहा सदरमुकाम प्रवेश निषेध गर्ने घोषणा गरेका छन्।

सनातन हिन्दु परिषद नेपालका अध्यक्ष मनिष कुमार यादव, समाजवादी ईन्जिनियरिङ एसोसिएसन नेपाल (सीन) मधेश प्रदेशका अध्यक्ष ई रोशन कुमार यादव, मात्रृभूमि युवा समाज नेपालका उपाध्यक्ष डा. अविनाश पुर्वे, प्रदेश युवा सञ्जाल मधेश प्रदेशका नइम राईनलगायतले अनसनकारीको मागलाई अविलम्ब सम्बोधन गर्न विज्ञप्ती जारी गरेका छन्।

हुलाकी रामजमार्गमा पर्ने कमला नदीमा नयाँ पुल निर्माणको माग गर्दै विभिन्न नेताहरू र समाजसेवीहरूले गत मंगलबारदेखि आमरन अनसनमा बसेका छन्। अनसनको समय लम्बिदै जाँदा अनसनकारीहरूको स्वास्थ्यमा समस्या देखा परेको छ। रक्तचापमा उतार-चढाव आएकोले तीनजनालाई स्लाइन पानी दिइएको छ। डा. कृष्ण कुमार यादवको नेतृत्वमा स्वास्थ्यकर्मीहरूले अनसनकारीहरूको स्वास्थ्य परीक्षण गरिरहेका छन्।