प्रतिनिधि सभाको बैठक बस्दै

काठमाडौँ, असार ११। संघीय संसदअन्तर्गत आज प्रतिनिधि सभाको बैठक बिहान ११ बजे बस्दैछ । आजको बैठकमा पनि विनियोजन विधेयकमाथिको छलफलमा उठेका प्रश्नहरूको सम्बन्धित मन्त्रालयका मन्त्रीहरूले जवाफ दिने कार्यसूची रहेको छ।

उपराष्ट्रपतिको कार्यालय र राष्ट्रपतिको कार्यालयको विभिन्न शीर्षकहरूमाथिको छलफलको क्रममा उठेका प्रश्नहरूको सम्बन्धित मन्त्रीहरूले जवाफ दिने कार्यसूची आजको बैठकका लागि तय गरिएको छ।

सभामुख देवराज घिमिरेले विनियोजन विधेयक, २०८१ अन्तर्गत निम्नलिखित मन्त्रालयहरुको विभिन्न शीर्षकहरुमा निम्नलिखित माननीय सदस्यहरुबाट प्रस्तुत खर्च कटौतीका प्रस्तावहरुलाई निर्णयार्थ प्रस्तुत गर्ने कार्यसूची रहेको छ ।

त्यस्तै अर्थ मन्त्री वर्षमान पुनले ’विनियोजन विधेयक, २०८१ लाई पारित गरियोस’ भनी प्रस्ताव प्रस्तुत गर्नुहुनेछ । उहाँले ’आर्थिक विधेयक, २०८१ माथि विचार गरियोस’, ’राष्ट्र ऋण उठाउने विधेयक, २०८१ माथि विचार गरियोस’ र ’भन्सार महसुल सम्बन्धी विधेयक, २०८१ माथि विचार गरियोस’ भनी प्रस्ताव प्रस्तुत गर्ने संसद् सचिवालयले जनाएको छ ।