पश्चिम नेपाल भूकम्प प्रभावित घरधुरीको लगत प्रमाणीकरण कार्य तीव्र

काठमाडौँ – पश्चिम नेपाल भूकम्प प्रभावित क्षेत्रका घरधुरीको विस्तृत क्षति आकलन (DDA) अन्तर्गत संकलित विवरणको प्रमाणीकरण र जाँच–पड्ताल कार्य तीव्र रूपमा अघि बढिरहेको छ।

स्थलगत सर्भेक्षणपछि प्राविधिकद्वारा अनलाइन प्रणालीमा प्रविष्ट गरिएका विवरणको प्रमाणीकरण कार्य शहरी विकास मन्त्रालय र पुल्चोक इन्जिनियरिंग क्याम्पसका स्ट्रक्चरल इञ्जिनियरहरूले गरिरहेका छन्।

हाल प्राधिकरणको सभाहल तथा कार्यकक्षमा शहरी विकास मन्त्रालयका ११ जना र पुल्चोक इन्जिनियरिंग क्याम्पसका १० जना स्ट्रक्चरल इञ्जिनियरहरू परिचालित छन्।

इञ्जिनियरहरूले विवरण प्रमाणीकरण गरेपछि लाभग्राही सूचीकरण, अनुदान सम्झौता, अनुदान वितरण हुँदै पुनर्निर्माण तथा प्रबलीकरणको प्रक्रिया सुरु गरिनेछ।

२०७९ को भूकम्पबाट प्रभावित डोटी, बझाङ र जाजरकोट जिल्लामा वैशाख २२ गते साँझसम्मको तथ्याङ्कअनुसार ४७,७४३ घरधुरीको स्थलगत विवरण संकलन भइसकेको प्राधिकरणले जनाएको छ।