“अतिक्रमणकारी र सुकुम्बासी छुट्याउने नै छौँ”-बालेन्द्र शाह

काठमाडौँ । काठमाडौँ उपत्यकाका नदी किनारमा बसोबास गर्दै आएका बस्तीहरू वर्षेनी बाढीको उच्च जोखिममा पर्ने गरेको अवस्थालाई ध्यानमा राख्दै सरकार सुरक्षित स्थानान्तरण र दीर्घकालीन व्यवस्थापनतर्फ अग्रसर भएको जनाएको छ । वर्षौँदेखि दोहोरिँदै आएको बाढीका कारण हजारौँ नागरिकले ज्यान जोगाउन घरबार र सम्पत्ति छाडेर विस्थापित हुनुपर्ने अवस्थाले समस्या गम्भीर बनेको भन्दै यसलाई अब स्थायी रूपमा समाधान गर्न आवश्यक रहेको बताइएको छ ।

सरकारले जोखिमयुक्त क्षेत्रमा बसोबास गरिरहेका नागरिकलाई सुरक्षित स्थानमा स्थानान्तरण गर्ने योजना अघि बढाएको उल्लेख गर्दै मानवीयता कायम राखी व्यवस्थित बसोबासको प्रबन्ध मिलाइने स्पष्ट पारेको छ । नदी तथा खोला किनारमा रहेका अव्यवस्थित बस्तीका कारण ढल निकास प्रणाली अवरुद्ध भई सहरको सरसफाइ र वातावरणमा नकारात्मक असर परेको भन्दै यसले सहरी व्यवस्थापनमा समेत चुनौती थपेको जनाइएको छ ।

थापाथली, गैरीगाउँ, मनोहरा लगायत क्षेत्रका बस्तीलाई प्राथमिकतामा राखी चरणबद्ध रूपमा सुरक्षित स्थानान्तरण गरिने तथा यस क्रममा बल प्रयोग नगरी मानवीय पक्षलाई केन्द्रमा राखिने सरकारी धारणा रहेको छ । साथै अतिक्रमणकारी र वास्तविक सुकुम्बासी छुट्याई दीर्घकालीन समाधानका लागि स्पष्ट नीति कार्यान्वयन गरिने बताइएको छ । बालेन्द्र शाहको सामाजिक सञ्जाल स्टाट्सः

सरकारले देशभर रहेका वास्तविक भूमिहीन सुकुम्बासीको पहिचान गरी कानुनी प्रक्रिया पूरा गर्दै छिट्टै जग्गा वितरण गर्ने तयारी गरिरहेको जनाएको छ । वर्षौँदेखि जटिल बनेको सुकुम्बासी समस्या समाधानका लागि समग्र योजना लागू गरिने र नागरिकलाई सुरक्षित तथा व्यवस्थित बसोबासको अधिकार सुनिश्चित गरिने दाबी गरिएको छ ।