हेडसरले स्वागत नगर्दा थर्काए जति सजिलो छैन मुलुक चलाउनः गोकुल बास्कोटा

काठमाडौं । नेकपा (एमाले) का नेता गोकुल बास्कोटाले देश चलाउने काम सजिलो नभएको बताएका छन्। उनले सामाजिक सञ्जालमार्फत टिप्पणी गर्दै, स्कुल–कलेजका सामुदायिक संगठन हटाउने कुरा जति सजिलो देखिन्छ, व्यवहारमा त्यति सजिलो नभएको बताएका हुन्।

बास्कोटाले हाल केही स्थानीय तहमा देखिएको कडाइप्रति संकेत गर्दै, कुनै निर्णय कार्यान्वयन गर्दा सबै पक्षलाई मिलाएर अघि बढ्नुपर्ने बताएका छन्। उनले विद्यालयका प्रधानाध्यापकलाई थर्काएर मात्र समस्या समाधान नहुने पनि उल्लेख गरेका छन्।

उनले अर्को महत्वपूर्ण विषय उठाउँदै, विदेशी दूतावास र अन्तर्राष्ट्रिय गैरसरकारी संस्था (आईएनजिओ)हरूले सरकारी स्वीकृति बिना नै स्थानीय तह, प्रदेश र एनजिओलाई सिधै अनुदान दिने प्रचलन रोक्नुपर्ने बताएका छन्। यस्तो सहयोगलाई बजेट प्रणालीभित्र ल्याउन सके राम्रो हुने उनको धारणा छ।

यदि यस्तो व्यवस्था लागू गर्न सकियो भने आफूले स्वागत गर्ने पनि उनले बताएका छन्। समग्रमा उनले नीति बनाउनु मात्र होइन, त्यसलाई व्यवहारमा लागू गर्नु नै सबैभन्दा ठूलो चुनौती भएको संकेत गरेका छन्।