सभापति रवि लामिछाने आज भारत भ्रमणमा जाँदै

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछाने आज पाँच दिने भारत भ्रमणमा जाँदै छन्। भारतीय जनता पार्टी (भाजपा) का अध्यक्ष नितिन नवीनको निमन्त्रणामा उनी भारत जान लागेका हुन्।

लामिछानेसँगै रास्वपाका सहमहामन्त्री तथा सांसद विपिनकुमार आचार्य, सांसद दीपक बोहोरा, पत्नी निकिता पौडेल र प्रदीप आचार्य पनि भ्रमण टोलीमा रहनेछन्। जेठ १८ देखि २२ गतेसम्म हुने भ्रमणका क्रममा लामिछानेले भारतको राजधानी नयाँदिल्लीमा विभिन्न राजनीतिक र कूटनीतिक भेटघाट गर्ने कार्यक्रम छ। उनले भाजपा नेतृत्व, भारतमा बसोबास गरिरहेका नेपाली समुदाय तथा पार्टीका शुभेच्छुकहरूसँग पनि भेट्नेछन् ।

भ्रमणका क्रममा उनले अयोध्याको समेत भ्रमण गर्ने कार्यक्रम रहेको रास्वपाले जनाएको छ। भेटघाट र भ्रमणको व्यवस्थापन तथा समन्वय नयाँदिल्लीस्थित नेपाली दूतावासले गरिरहेको पार्टीले जानकारी दिएको छ । पार्टीले आइतबार जारी गरेको प्रेस विज्ञप्ति अनुसार भ्रमणका क्रममा सभापति लामिछानेले भारतको नयाँ दिल्लीमा उच्चस्तरीय राजनीतिक तथा कूटनीतिक भेटवार्ता गर्नुहुने कार्यक्रम छ ।