काठमाडौँ, भदौ २५ ।सिभिल सेभिङ एण्ड क्रेडिट सहकारी संस्थालाई समस्याग्रस्त घोषणा गरिएको छ । बिहीबार बागमती प्रदेशको संस्कृति पर्यटन तथा सहकारी मन्त्रालयले सिभिल सेभिङ एण्ड क्रेडिट सहकारीलाई समस्याग्रस्त घोषणा गरेको हो ।
यसअघि सहकारी विभाग, सीआईबी र प्रादेशिक तहहरूमा पटक पटक उजुरी परेपछि सहकारीलाई समस्याग्रस्त घोषणा गरिएको हो ।
बागमती प्रादेशिक मन्त्रालयका अनुसार प्रदेश सहकारी ऐन २०७६ को दफा ८१ मा भएको व्यवस्थामा टेकेर दफा ८२ अनुरूप सिभिल सहकारीलाई समस्याग्रस्त घोषणा गरिएको हो ।
बागमती प्रदेश समस्याग्रस्त सहकारी व्यवस्थापन समितिको गठन नभएकोले सहकारीलाई केन्द्र मातहतमा पठाइएको बागमती प्रदेश संस्कृति पर्यटन तथा सहकारी मन्त्रालयका अधिकृत रोहित पोखरेलले बताए ।
उनले भने, ‘सहकारीको सम्पत्ति व्यवस्थापन र दायित्व भुक्तानीका लागि सहकारी व्यवस्थापन समितिले हेर्ने गरी सहकारी विभागमार्फत भूमि व्यवस्था, सहकारी तथा गरिबी निवारण मन्त्रालयमा पठाइसकेको छ ।’
बागमती प्रादेशिक मन्त्रालयले सहकारीलाई समस्याग्रस्त घोषणा गरेपछि केन्द्र मातहत अर्थात् भूमि व्यवस्था, सहकारी तथा गरिबी निवारण मन्त्रालयमा पठाएको छ ।
यसअघि सिभिल सहकारीका बचतकर्ताको उजुरीमा सीआईबीले पूर्व अध्यक्ष इच्छाराज तामाङ तथा सहकारीका वर्तमान अध्यक्ष केशवलाल श्रेष्ठसहित १२ जनालाई हिरासतमा राखेको थियो । जहाँ १ हजार ४९९ जना पीडित बचतकर्ताबाट ५ अर्ब ६७ करोड ९ लाख ७६ हजार रुपैयाँको लिखित उजुरी परेको थियो ।
सम्पादक:
लोकेन्द्र भण्डारी
समाचार संयोजक:
सुनिल आचार्य
रिपोर्टर:
अनिता बिष्ट
सरोज वोलखे
