निजामती सेवा दिवसको अवसरमा प्रधानमन्त्री ओलीद्धारा शुभकामना व्यक्त

काठमाडौं । प्रधानमन्त्री केपी शर्मा ओलीले सामान्य काम गर्न धेरै झन्झटिलो प्रक्रिया देखाउने पुरानो शैली अब बदलिनुपर्ने बताएका छन्। निजामती सेवा दिवसको अवसरमा शुभकामना सन्देश दिँदै उनले कर्मचारीले नागरिकलाई सहज र छिटो सेवा दिनुपर्नेमा जोड दिए।

प्रधानमन्त्री ओलीका अनुसार, बदलिँदो प्रविधि, जनअपेक्षा र विश्व परिवेश अनुसार निजामती सेवामा सुधार आवश्यक छ। सरकारको योजना र नीति जनता सम्म पुर्‍याउने जिम्मा निजामती सेवाको भएकाले, कर्मचारीले आफ्नो भूमिकालाई गम्भीरतापूर्वक लिनुपर्ने उनले बताए।

उनले अब नागरिक सेवा खोज्दै हिँड्ने होइन, सेवाले नै नागरिक कहाँ पुग्ने समय आएको बताए। टेबल–कुर्सीमा मात्र बसेर होइन, प्रविधिमार्फत सेवा दिनुपर्ने बेला आएको भन्दै उनले ई–गभर्नेन्स र अनलाइन सेवाको महत्व उल्लेख गरे।

प्रधानमन्त्रीले पछिल्लो समय कर्मचारीतर्फ जनविश्वास कम हुँदै गएको स्वीकार गर्दै, जनतालाई दुःख दिने प्रवृत्ति रोक्न जरुरी भएको बताए।उच्च मनोबलका साथ काम गर्न सबै कर्मचारीलाई आह्वान गर्दै, उनले पारदर्शी, जवाफदेही र नतिजामुखी सेवाको माग बढेको बताए।

शुभकामना सन्देशमार्फत उनले उज्ज्वल भविष्यका लागि सबै निजामती कर्मचारीलाई शुभेच्छा व्यक्त गरेका छन् ।